Pîrozbahiya Newrozê, li parka Cigerxwînê ya Nisêbînê bi dirûşmeya “Her der Newroz, her dem azadî” çêbû. Bi dehhezarana mezin û biçûk, bi cil û bergên xwe yên neteweyî tev li pîrozbahiyê bûn.

Gel, gelek caran bi dirûşmeyên “Bijî Serok Apo”, “Bê Serok jiyan nabe”, “Bijî Kurdistan”, “Jin jiyan azadî” û “Her der Newroz, her dem azadî” bilind kirin. Li qadê, li gelek cihan pankartên “Newroz pîroz be” û “Her der Newroz, her dem azadî” û alên Partiya Çepgir a Kesk û Partiya Demokratîk a Gelan (HDP) hatin daliqandin.

Destpêkê, parlamenterê HDP’ê yê Êlîhê Mehmet Ruştu Tiryakî axivî û destnîşan kir ku ev Newroz, xwestina hesab ji hikûmeta AKP’ê û MHP’ê ye û got : “Desthilardar, di erdhejê de têkçûyîna xwe amade kir. Êdî gel vê hikûmetê naxwaze û wê li ser sindoqan bersiva wê bide.’’

Berdevka HDP’ê Ebru Gunay jî bal kişand ser tecrîda girankirî ya li ser Rêberê Gelê Kurd Abdullah Ocalan û got: “Hêz û coşa ku bi 8’ê Adarê dest pê kir, bi Newrozê hate tacîdarkirin. Lê serkeftina mezin bi hilweşîna faşîzmê pêkan e. Di hilbijartinê de em ê hesab bipirsin û faşîzma AKP’ê MHP’ê bi rê bikin. Hilbijartina 14’ê Gulanê ji bo me pir giring e, em ê jî bi peywir û rola xwe rabibin. Lê guhertina esas, têkbirina tecrîdê ye. Gel, azadiya birêz Ocalan dixwaze û li dora agirê Newrozê dengê welatiyan ê ji bo azadiya birêz Ocalan geş dibe. Desthilatdar, her çiqas di polîtîkayên tecrîdê de bi israr be jî bi ser nakeve. Ji ber ku birêz Ocalan çareseriya aştiyê û demokrasiyê ye.”

Newroz, bi stran û awazên hunermend Mervan Tan bi dawî bû. Gel dirûşmeya ‘’Bijî Serok Apo’’ berz kir û ji qadê belav bû.