"Qedexeya derketina derve" ku li 27 gundên navçeya Licê ya Amedê hatibû ragihandin, du êvarê saet di 18:00 de hate rakirin. Rêyên van gundên "qedexe" ku timî operasyon lê tên kirin, bi xendek û keviran hatin girtin. Gundiyan dan xuyakirin, ku qedexe wê piştî cejnê careke din bê ragihandin û nerazîbûn nîşan dan.

Gundiyan her wiha ragihandin, di dema qedexeyê de hêzên çekdar ên dewletê avêtine ser gelek malan, bi dehan welatî binçav kirine û herî dawî daristana li gundê Yolçati yê Licê hatiye şewitandin.

Gundiyan gotin, ji ber şewata ku nîv saetê dewam kir gelek daristan şewitîn û bi saya baranê agir vemirî ye. Gundiyan diyar kirin, her sal di vê demê de ew dikevin nava tirs û fikara şewata daristanê.