KCD'ê li ser mijarê daxuyaniyeke nivîskî weşand û wiha got, "AKP û serokê wê yê giştî Tayyîp Erdogan ji sala 2002’an roja hatine ser desthilatdariyê û heta niha bi awayekî hovane êrîşî ser gelê Kurd dike. Bi taybetî li hemberî siyaseta Kurd hemû saziyê dewletê tevlî vê êrîşê kirine û bi vî awayî dijminatiya xwe ya li hemberî Kurdan nîşan dide.

Di hilbijarta 2009'an de Erdogan û AKP`ê li Kurdistanê têk çûn û li hemberî vê têkçûnê di 14’ê Nîsana 2009’an de dest  operasyonên qirkirina siyasî kirin. Di vê operasyona qirkirina siyasî de bi hezaran siyasetmedarên Kurd girtin û li girtîgehan wekî rehîn ragirtin. Dîsa, di hilbijartina 7’ê Hezîranê de jî dîktatoriya faşîst a Erdogan-Bahçelî li Kurdistanê têk çûn û Hevserokên HDP’ê Selahattîn Demîrtaş, Fîgen Yuksekdag jî di nav de bi hezaran parlamenter, hevşaredar, rojnamger, akademîsyen û hwd. bi operasyonên qirkirina siyasî girtin û li girtîgehan wekî rehîn radigirin. Her wiha şaredariyên li Kurdistanê, sazî û dezgehên kurd xesp û dagir kirin.

Erdogan ê ku li gel van pêkanînên faşîzan jî nikare vîna gelê Kurd têk bibe, di daxuyaniya xwe ya li Hambûrgê de, ku civîna bilind a G20 lê pêk hat, derbarê Hevserokê HDP’ê birêz Selahattîn Demîrtaş gotinên kirêt bi kar anî û bi van gotinan li xwe mikur hat ku operasyonên qirkirinê li ser fermana wî pêk hatine û ew  xwe vê operasyonê bi rê ve dibe. Kesê ku li hemberî çalakiya demokratîk a gelê Kurd gotina 'zarok be jî, jin be jî wê hêzên ewlehiyê çi pêwîst be bikin' fermana qetilkirina zarokê biçûk Enes Ata û bi dehan zarok û kesan daye, fermana hilweşandina Sûr, Nisêbîn, Cizîr, Gever, Şirnex û gelek bajarên Kurdistanê û şewitandina mirovên di jêrzemînan de bi awayekî zindî hatin şewitandin daye, ji birêz Selahattîn Demîrtaş ê ku bi 6 milyon dengan hat hilbijartin re dibêje 'terorîst' tê wateya 'terorîzekirina' gelên Kurdistan û Tirkiyeyê.

Em Kongreya Civaka Demokratîk diyar dikin ku divê were zanîn hemû çalakiyên demokratîk ên li hemberî dîktatoriya faşîst a Erdogan-Bahçelî yên ku fermana qetilkirina bi hezaran welatiyên me dane rewa û mafdar in. Xwedîderketina li Demîrtaş, Yuksekdag û hwd. ên bi dengên gelên Kurdistan û Tirkiyeyê hatine hilbijartin û hemû girtiyên siyasî peywireke dîrokî ye. Li ser vê bingehê, em di serî de bang li gelên Kurdistan û Tirkiyeyê, hemû sazî û dezgehên demokratîk, sosyalîst û şoreşger dikin ku xwedî li hemû girtiyên siyasî derkevin."