Di çarçoveya serdozgeriya Komarê ya Amedê de roja 8’ê Hezîranê Hevserokê Komeleya Rojnamevanan a Dîcle Firatê Serdar Altan, Midûrê Karên Nivîsan a Rojnameya Xwebûnê Mehmet Alî Ertaş, nûçegihanê Xwebûnê Zeynel Abîdîn Bulut, Midûra JINNEWS'ê Safiye Alagaş, edîtora JINNEWS'ê Gulşen Koçûk, edîtorê Ajansa Mezopotamyayê (MA) Azîz Orûç û rojnamevan Omer Çelîk, Lezgîn Akdenîz, Mehmet Şahîn, Sûat Dogûhan, Ramazan Gecîken, Neşe Toprak, Îbrahîm Koyûncû, Esmer Tûnç, Mazlûm Dogan Guler, Elîf Ungur, Remziye Temel, Abdurrahman Oncu, Kadîr Bayram, Mehmet Yalçin û her wiha welatiyên bi navê Feynaz Koçûk û Îhsan Ergulen hatibûn destgîkirin. Piştî karûbarên îfadeyên li Midûriyeta Polîsan vê sibehê birin Edliyeya Amedê û li vir karûbarên îfadegirtinê didome.

PIRSA ‘ŞER ÇI YE?’ JI ROJNAMEVANAN HATIYE KIRIN

Dozger îfadeyên edîtorê ajansa me Azîz Orûç girt û bernameyên televîzyonê ku Oruç amade dikir, zimanê bernameyan û bi vê re girêdayî pirsen wek “Şer çi ye? Pirsgirêka Kurd çi ye?” jê kiriye. Dozger ji rojnamevan Safiye Algaş jî nûçeyên çêkiriye û naveroka nûçeyan pirs kiriye. Dozger her du rojnamevanan jî bi daxwaza girtinê sewqî dadgehê kir.

KOÇUK HAT BERDAN

Pişt re îfadeya edîtora JINNEWS’ê Gulşen Koçuk hat girtin û daxwaza şertê kontrola edlî kir. Koçuk pişt re hat berdan û hevpîşeyên wê li ber edliyeyê ew pêşwazî kirin.

JI BO ERTAŞ Û UNGUR DAXWAZA GIRTINÊ

Dozger ji Midûrê Nivîsan ê Rojnameya Xwebûnê Mehmet Alî Ertaş û rojnamevan Elîf Ungur jî bernameyên ku amade dikirin pirs kir û bi daxwaza girtinê wan sewqî dadgehê kir.

Karûbarên îfadegirtina rojnamevanên din û her du welatiyan berdewam dike.