HDP’ê di nav çarçoweya referandûmê de ji bo mîtînga 15’ê Nîsanê ya li Meydana 5’ê Hezîranê (Meydana Stasyonê) li avahiya Rêxistinê ya Bajêr bi tevlêbûna Wekîl, Hevserokên HDP, DBP’ê yên Bajêr û Komîteya Amadekar civîneke çapemeniyê lidar xist. Hevseroka Komîteya Amedekar û Hevseroka Bajêr a HDP’ê Gulşen Ozer diyar kir ku ew di şertên Rewşa Awarte de dixebitin û got, "Coşa ku bi 8’ê Adarê dest pê kirî, bi Newrozê dewam kirî, em ê bi mîtînga fînalê ya referandûmê pêk bînin."

Ozer got, "Em ê referandûmê bi coşa mîtîngê pîroz bikin. Ji bo mîtîngê ewlekarî di asta bilind de ye" û bang li gelê Amedê kir ku 15’ê Nîsanê werin Meydana Stasyonê.

Hevserokê DBP’ê yê Bajêr Zekî Baran jî got siyasetmedarên HDP, DBP’ê girtî ne û şertên referandûmê destnîşan kir. Baran got, "AKP li ser referandûmê xebatên siyasî nekir, polîtîkayên zext û zordariyê bi rê ve bir. Di ser walî, qeymeqam û polîsan re xebatên referandûmê bi rê ve bir."

Baran bang kir ku gel li sindoqan xwedî derbikeve û got, "Wê zehmet be lê encamên wê bêhempa bin."

'EM DI 15'Ê NÎSANÊ DE ENCAMA REFERANDÛMÊ EŞKERE BIKIN'

Wekîl Feleknas Ûca jî got ev referandûmeke dîrokî ye û wiha pê de çû: "Em bi giyanê 8’ê Adarê, Newrozê, azadiyê û bi berxwedana zindanê em li Meydana Stasyonê bin. Em encama referandûmê di 15’ê Nîsanê de eşkere bikin."

'EM Ê DERIYÊN ZINDANAN BIŞKÎNIN'

Ûca bal kişande ser girêva birçîbûnê û got, "Divê gelê me li çalakiyên girêva birçîbûnê xwedî derkeve. Çalakî hatiye ber sînorê mirinê. Divê em dengê zindanan bibihîsin û gur bikin. Zindan ji bo azadî û siberoja Kurdan li ber xwe didin. Em berxwedana zindanan slav dikin. Azadî nêz e, bi têkoşîna xwe ya hatî ser referandûmê em ê deriyên zindanan bişkînin."

Endamê Desteya Rêveber a Navendî HDP’ê Omer Onen jî li dijî qirkirina operayonên siyasî yên li Amedê û li dijî zexta li ser nûçegihan nerazîbûn nîşan da.

Onen got, "Gel 16’ê Nîsanê wê biçe ser sindoqê û hesabê van hemû tiştan bipirse. Wê bersiva wê bide ku em ê bi vîna xwe, nasnameya xwe, çanda xwe ya ku hatiye desteserkirin bijîn."