Xebatên PADÊ yên ji bo hilbijartinên giştî yên Iraqê berdewam dikin. Di çarçoveya xebatên ji bo hilbijartina Parlamantoya Iraqê de, îro li navenda bajarê Şengalê PADÊ mitîng lidar xist.
Xebatên Partiya Azadî û Demokrasiya Êzidiyan (PADÊ) ên ji bo hilbijartinên Iraqê didomin. PADÊ li navenda Şengalê mitîngek lidar xist. Mitîngê di saet 15:00’an de, bi deqeyek rêzgirtina ji bo şehîdên Êzidxanê destpê kir.
Di mitîngê de axaftin hatin kirin. Di destpêkê de, li ser navê Meclîsa Xweser û Demokratîk a Şengalê, Hevserokê Meclîsê Hisên Hecî axivî û got: "Heta niha bi dehan partiyên siyasî hene, lê yek partiyê jî heta niha û di dema fermanê de jî tiştek ji bo gelê me nekirine, lê piştî propaganda hilbijartina destpêkir, her kes serdana gelê Êzidî dike û dixwazin cardin gelê me bixapînin. Em ji gelê xwe dixwazin di roja dengdanê de pêşeroja xwe diyar bikin û dengê xwe bidin wan kesa yên ku xizmeta gelê me dikin. Divê gelê me neyê xapandin."
Hisên axaftina xwe wiha domand; "Bila gelê me baş bizane heta niha ferman û êrîş li ser me dewam dikin, ger em ji bîr nekin, emê rê nedin di bin navê Êzidiyan de ti kes me bixapîne."
Piştre namzetên PADÊ'yê Xwedêda Murad û Semir Derwêş û li ser navê PADÊ Mirad Xaltî axivîn û bang li gelê Êzidî kirin deng bidin namzetên xwe.
Di dawiya mitîngê de govend hate gerandin û piştre karwanê wesayîtan li navenda bajarê Şengalê geriya.
