Îro li Nûnertiya HDP’ê ya li bajarê Hewlerê  Başûrê Kurdistanê  daxuyaniyek çapemeniyê hat dayîn. Di daxuyaniyê de Hevseroka Nunertiya HDP’ê Muzeyen Guneş axivî û diyar kir ku zextên Asayişa Hewlêrê ku ser bi PDK’ê ye careke dî dest pê kiriye. Her wiha Muzeyen Guneş got: “Beri hefteyekê asayişa Hewlêrê Ehmed Barbaros yê  ku ji Bakurê Kurdistanê hatiye Başûrê Kurdistanê vexwendine asayişê û ji wî re gotine ‘divê tu êdi neçî  avahiya HDP’ê ya Başûr û tevlî tu çalakiyên siyasî nebî û eger tu beşdarî çalakiyên siyasî bibî em ê te radesti dewleta Tirkiyê bikin. Asayîşa Hewlêrê ji bo ku Ehmed Barbaros Hewlêrê bi cih bihêle mehek dem ji bo wî diyar kirine.” 

Muzeyen Guneş bal kişande ser rewşa Hecî Ozen û wiha domand: “Hecî Ozen ku beriya bi şeş mehan li Hewlêrê ji aliyê asayîşê ve hatibû girtin û asayîşa Hewlêre her carê ji bo malbat û endamên HDP digot ne li gel me ye. Derket holê ku berî bi hefteyekê li asayişa Hewlêrê bû û asayişê ji bo wî radestî dewleta Tirk bikin, ew birine Soran, ser sînorê Başûr û Bakurê Kurdistanê.  Lê Hecî Ozen li gundê Mawana yê Bakurê Kurdistanê  karîbû xwe rizgar bike û niha jî li cihek bi ewle ye.”  

Hêjayî gotinê ye ku di nava 5 mehên dawî de asayîşa Hewlêrê ku ser bi PDK’ê  ye bi dehan Kurdên Bakur ku ji ber doza siyasî û zextên dewleta Tirk hatine Başûrê Kurdistanê ji herêmên di bin kontrola PDK’ê de dersînor kirine. Hinek li Silêmaniyê hinek ji derbazî Rojavayê Kurdistanê bûne.