Li Hewlêra Herêma Kurdistanê di 17’ê Tîrmeha 2019'an de li dijî wezîfedarê Sefaretxaneya Tirkiyeyê ya Hewlêrê dîplomatê tirk Osman Kose êrîş pêk hat. Di êrîşê de Kose û welatiya Iraqê Nerîman Osman û welatiyê ji Hewlêrê Beşdar Ramazan di êrîşê de jiyana xwe ji dest dan. Mazlûm Dag û Abdrrahman Er bi sedema vê êrîşê hatibûn girtin. Dag û Er li Girtîgeha Hewlêrê tên ragirtin.

Mazlûm Dag bi rêya telefonê li malbata xwe geriya û behsa binpêkirinên li girtîgehê kir. Dag ji malbata xwe re ragihand ku hêzên PDK’ê êşkenceya fizîkî li wan dikin û wiha got: “Lêgerînên kêfî tên kirin. Tundiya fizîkî û heqaretan li me dikin. Du sê hefte berê sepana cilên yek tîp li me ferz kirin. Me qebûl nekir. Ji me re gotin em ê mafên telefon û revîrê ji destê we bigirin. Gotin em ê we bixin odeyên yek kesî.” 

Malbata Dag diyar kir ku ew ji 14’ê gulanê şûn ve bi lawê xwe re neaxivîne û ji jiyana wî fikaran dikin.