Fermandariya Yekîneyên Parastina Rojhilatê Kurdistanê (YRK) bi daxuyaniyekê şehîd Simko Serhildan ê di 3’yê Îlona 2011’an de li Qendîlê şehîd bû, bi bîr anî.

Daxuyaniya YRK’ê bi vî rengî ye:

“13 sal di ser şehîdbûna fermandarê pêşeng Simko Serhildan re derbas dibin. Bi vê boneyê em di şexsê Şehîd Simko de hemû şehîdên destana Qendîlê û hemû şehîdên rêya azadiya Kurdistanê bi bîr tînin, em bi rêz û hurmet serê xwe li ber wan ditewînin û soza domandina têkoşîna rêya azadiyê heta serkeftinê dubare dikin.

Dema ku em dîroka hebûna Kurdan radixin ber çavan, pir zehmet e ku em şer û jiyanê ji hev cuda bikin. Hemû qadên hebûn û mayînê bi astengiyan re rû bi rû ne, dijminan ji bo bêçarehiştina gelê me rêyek nemaye ku serî lê nedabe û neceribandibe. Di rewşeke wiha de şer nikare di wateya pevçûn û parastineke sade de sînordar bimîne. Di rewşeke wiha de ku sînorên wateya jiyan û hebûnê hatine bertengkirin, şerekî biwate û rasteqîne jî çênabe. Şervanê jêhatî, pispor û bihêz jî perwerde nabe. Kokê berxwedanê di wateya jiyanê de ye. Wateya jiyan û mayînê di nav neteweyekê de çi qas berfirehtir bibe, şervan û fermandarên jêhatî, pispor û leheng jî ew qas zêde tên perwerdekirin. Heta ku di qada wateyê de şer neyê kirin, mirov nikare şerekî bihêz li hember dijmin bimeşîne. Li vir şer dibe hunera berfirehkirina sînorên hebûn û jiyanê. Şerekî wisa ku asta famkirina azadiyê diguherîne.

Xemsariya têkoşîna qada wateyê, bi dirêjahiya dîroka me nehiştiye ku hêz û şiyana me yekgirtî be û em di şer de hînî afirandin û dahênanê bibin. Tevgera Apoyî bi famkirina vê xalê her tim hewl daye ku bi watedarkirina jiyanê di çawaniya şer û lehengiya Kurdan de guherînê çêke. Tevgera Apoyî li ser vê bingehê fermandariya jiyan û şer têkel kiriye. Ev şêwazeke nû ya kesayetiya Kurd e ku çeka wate û ramanê û çeka şer û derbelêdanê bi hev re dixebitîne. Şehîd Simko Serhildan şagirtê nimûne û jêhatî yê vê dibistana fikrî ye û bi hemû jêhatîbûn û afirîneriya xwe di destana Qendîlê de hunera şer nîşanî gelê Kurd, dijminan û hemû cîhanê da. Ji hestan bigire heta hêrsê, ji şiyan û hêzê bigire heta digihîje raman, tevger, êrîş û taktîkê; fermandarekî rêxistinkirî yê biarmanc û biaso bû. Fermandarek bû ku aqil û hunera şer ji bo bilindkirina çawaniya şer û lehengiyê bi kar dianî. Remza serkeftina destana Qendîlê li hember artêşeke pirderfet û pirhejmar û pirçek, têgihiştineke nû ye ji azadî û jiyanê. Wekî ku Şehîd Simko digot: “Encama şer beriya şer diyar dike û di çawaniya jiyanê de veşartî ye.” Simko Serhildan îro zanîngehek û dibistaneke jiyanê û xwendingeheke hunerî ya parastin û şervanî û berxwedanê ye.

Vê rêya têkoşînê li rojhilatê Kurdistanê bi pêşengiya Şehîd Simko Serhildan û nûnerên din ên wekî Aryen Arê, Rênas Roj, Hîwa Sine, Hewram Awyer, Leşker Selmas, Axîn Wirmê, Rojhat Şer, Adil Seqiz, Awat Mehabad, Dilgeş Bokan, Cîhan Azad û Viyan Peyman berdewam kir û didome. Xwendekarên vê dibistanê ne tenê li rojhilatê Kurdistanê, her wiha li hemû qadên têkoşîna neteweyî û ji bo parastina hemû destkeft û nirxên me yên neteweyî û parastina hebûn û nasnameya gelê me fedakarane di nav têkoşînê de ne. Ji Bakur heta Mexmûr, Kerkûk û Şengal û Rojava bi hemû fedakariyê şerê jiyanê meşandine û dimeşînin. Niha jî di şerê tijî şanazî de; şerê jiyan û nejiyanê, şerê serbilindî û xiyanetê li Zap û Metîna û Bradostê bi heman hunera lehengiyê rûpelên zêrîn tomar dikin. Dibistaneke ku dersên wê her tim bihêztir û xurttir dibin û bê rawestan û bê bêhnvedan şervanên bibawerî dişîne rêya serbilindî û serkeftinê.

Di demekê de ku em 13’emîn salvegera fermandarê nemir û şervanê herheyî Şehîd Simko Serhildan bi bîr tînin, êrîşeke berfireh û piralî li ser gelê me û li hemû parçeyên Kurdistanê tê meşandin. Em Kurd mehkûmî têkoşîn û serkeftinê ne. Em bextewer in ku em ne wekî berê dijîn û ne wekî berê şer dikin. Di hunera şer û jiyanê de me gavên girîng avêtine. Hemû dijmin û xayîn ji vê yekê ditirsin, ji Kurdekî ku dizane çawa xwe biparêze û çawa şer bike, ji Kurdekî ku erka parastinê naspêre tu kesî, ji gelekî ku dizane bêyî jinavbirina xeta xiyanetê nikare serkeftinê misoger bike. Nifşê nû yê Kurd divê girîngiyê bide vê derfetê û beşdarî jinavbirina eniya xiyanetê bibe. Xwe di hunera şer û têkoşîn û parastinê de perwerde bike. Divê ciwanên Kurd bizanin ku bê parastina destkeftên neteweyî li her çar parçeyên Kurdistanê tu gavek ber bi siberojê nayê avêtin. Divê bi hemû hêza xwe beşdarî şerê azadiyê bibin. Careke din em xatireya fermandarê hêja yê neteweyî Şehîd Simko bi bîr tînin û soza xwe dubare dikin ku heta serkeftinê em ê rê û rêbaza şehîdan bidomînin.”