Endamên Kongreya Îslamî ya Demokratîk (KÎD) li Pirtûkxaneya Ronakbîrî û Îrfanê ya Silêmanî bi rojeva "Îslama Medîne" û "Efrînê" li hev civiyan.

Gelek mele û seyda tevlî civînê bûn. Civînê 2 saetan dewam kir.

'BI NAVÊ ÎSLAMÊ XWÎNA KURDAN DIRIJÎNIN'

Mele Niyaz Çomanî piştî civînê daxuyanî da çapemeniyê û bi bÎr xist ku gelê Kurd demeke dirêje li ser axa xwe zilmê dibîne. Çomanî got, "Mixabin beşeke mezin a vê zilmê bi navê Îslamê hatiye kirin. Hewl hatiye dayin ku ola ma ya bedew bikin amûrek ji bo polîtîkayên qewmî û kujer. Lê me ji roja destpêkê ve ji xwe re Îslama Medîneyê esas girt."

Çomanî bal kişand ser êrîşên dewleta Tirk ên ji bo dagirkirina Efrînê û got, "AKP û Erdogan li her çar parçeyan zilmê li Kurdan dikin. Divê alema Îslamê li ber vê zilmê rabe. Îro vê ola me ya pîroz bi kar tînin û bi navê wê, xwîna Kurdan dirijînin. Ev zilm e, divê kes bêdeng nemîne."

Endamên Kongreya Îslamî ya Demokratîk piştre çûn serdana Nûnertiya Kantonên Rojava ya li Başûrê Kurdistanê.