Çalakiya nobetê ya li dijî êrîşên dewleta tirk û koma wê ya paramîlîter SMO’yê yên li ser Bakur û Rojhilatê Sûriyeyê li ser sînorê Nisêbîn a Mêrdînê û Qamişloyê hatiye destpêkirin di roja 8’an de didome. Ji saetên serê sibehê ve gelek welatî hati gel hev û dirûşmên “Bijî berxwedana Rojava”, "Rojava rûmeta me ye” û “Rojava dilê me, berxwedan karê me ye” berz kirin. Çalakvanan, pêşmalkên bi nivîsa “Na ji şer re”, “Bijî berxwedana Rojava" û “Rojava rûmeta me ye” li xwe kirin. Di çalakiyê de stranên berxwedanê hatin gotin. Şandeya ji Mûşê hatibû jî piştgirî da çalakiyê.

Li cihê çalakiyê daxuyanî hate dayin. Rêveberê Rêxistina DEM Partiyê yê Mûşê Kerem Çitalak di daxuyaniyê de wiha got: “Li Rojava polîtîkayên şerê taybet tên meşandin. Em bang li her kesî dikin; destê xwe li ser Rojava bikişînin. Zarokên vî welatî ji bo azadiya xwe têkoşiyan. Statûya gelê Kurd nas bikin. Gelê Kurd gelekî aştîxwaz e. Ji Serhedê heta Botanê çavê hemû Kurdan li ser Rojava ye.”

Parlamentera DEM Partiyê ya Colemêrgê Oznûr Bartin jî anî ziman ku ew li dijî “dagirkerî” û şer nobetê digirin û got ku sînorên çêkirî dê nekiarin gel ji hev qut bikin. Oznûr Bartin, axaftina xwe wiha domand: “Li dijî pergala ku dibêje qey dê gelê Rojava û gelê vir ji hev qut bike, em ê berxwedana xwe mezintir bikin. Em soz didin ku dê têkoşîna xwe ya li dijî şerê taybet mezintir bikin. Îro jî me agahiyeke pir biêş girt û du hevalên me yên bi sala ye li qadê li dijî polîtîkayên dagirkerî û tunekirinê ked didan, hatin qetilkirin. Em vê komkujiyê şermezar dikin. Ji bo vegotina heqîqetê her yek ji me dê mîna xebatkarên Çapemeniya Azad têbikoşin. Em ê her qadê veguherînin qada berxwedanê. Şoreşa Rojava, serfiraziya hezar salan e. Netewe dewleta otorîter bi zanebûn vê rêberiya demokratîk hedef digire. Lê bi saya têkoşîna hevpar a gelan dê ev zext bên têkbirin. Li dijî kesên hiqûqa mirovahî û gerdûnî binpê dikin, em banga hatine vê qadê li her kesî dikin. Bi bêdengiya xwe hûn piştgiriyê didin van tiştên diqewimin.”

Parlamentera DEM Partiyê ya Mêrdînê Bêrîtan Guneş jî rojnameger Nazim Daştan û Cîhan Bîlgîn bi bîr anî û ev tişt anî ziman: “Îro jî Rojava bi SÎHA’yan tê bombebarankirin. Me, du hevalên xwe yên tevî zehmetiyan jî têdikoşiyan winda kirin. Rojnameger Cîhan Bîlgîn û Nazim Daştan ji roja li Rojava şer dest pê kirî heta niha geşedanên li wir bi me re û bi raya giştî ya cîhanê re parve kirin. Lewma hedef hatin girtin. Dema DAÎŞ ji sînorê Tirkiyeyê derbasî Rojava dibû, Nazim bi pênûsa xwe nivîsand. Digotin ‘Tişrîn ket’ û hevala me Cîhanê derxist holê ku tiştekî wiha tune ye. Her du hevalên me jî rûyê rast ê dewleta tirk derxist holê. Lewma hedef hatin girtin. Lê belê bila bizanin ku dê tu caran nekarin rêya hevalên me bigirin. Ji ber ku hevalên me yên peyrewên wan dê makîne û pênûsa wan li erdê nehêlin. Em deyndarên hevalên xwe Cîhan û Nazim in. Em jî îro li vir soz didin wan; em ê xwe bigihînin dîroka li benda me û dê navên we bi tîpên zêrîn binivîsin.”

Daxuyanî bi çepik û dirûşman bi dawî bû.