Li navçeya Nisêbînê ya Mêrdînê di qedexeya derketina kolanan de, 17 zarok di 26'ê Gulana 2016'an de li avahiya ku lê asê mabûn, hatibûn destgîrkirin û girtin. 7'emîn danişîna doza 17 zarokên ku li Nisêbînê hatin destgîrkirin û girtin û piştre dozger ji bo her yekî 76 sal ceza ji wan re dixwaze, li 4'emîn dadgeha Cezayên Giran a Mêrdînê pêk hat.

ZAROK NEANÎN SALONÊ

Dozger, ji bo her zarokekî 76 sal cezayê girtîgehê û muebeta giran dixwaze. Ji 17 zarokên ku tên darizandin, tenê 3 zarokên ku li Girtîgeha Sincanê û 5 zarokên ku li Mêrdîn û Amedê tên girtin, anîn salonê. Zorokên ku li Girtîgeha Xerpêtê li gel biryara dadgehê ku pewîst e ku li salonê amade bûna, neanîn salonê. Zarokên ku neanîn salonê bi rêya SEGBÎS'ê tevlî danişînê bûn.

Li salonê parêzer û malbatên zarokan amade bûn. Danişîn girtî pêk hat. Parêzeran di parastinê de diyar kir ku dema zarok hatine destgîrkirin êşkence li wan hatiye kirin û xwest ew dîmenên ku zarok rastî îşkenceyê hatine bên lekolînkirin. Parêzeran xwest ku heyet zarokan tahliye bike. Lê heyetê hemû daxwazên parêzeran red kir û zarok berneda.

Dadgeha Tirk, doz taloqî 5'ê Nîsanê kir.