Cenazeyên 4 şervanên YBŞ/YJŞ, endamekî Asayîşa Êzdîxanê û gerîlayek HPG'ê ku di êrîşa komên çete yên girêdayî PDK û AKP’ê de roja 3'ê Adarê de li ser Xanesorê şehîd bûn, wê îro li Çiyayê Şengalê bên veşartin.
Cenazeyên gerîlayê HPG'ê Newroz Guvercîn (Çekdar Sinan), şervanên YBŞ’ê Elyas Xelef Îsa Xidir (Çiya Zerdeşt), Zuleyha Sarialtun (Tekoşîn Serhed), Xidir Meto Quto (Şoreş Sîba) û Feysel Xelef Nepsa Dirbo (Arif Tilqesep), endamê Asayîşa Êzdîxanê Selam Elî Mixebir (Amed Şengalî) wê îro bispêrin axê.
Cenazeyên 6 têkoşeran wê îro ji gundê Xelef ê Xanesorê bi karwanek wesayîtan bên wergirtin û bibin Çiyayê Şengalê. Cenaze wê li gorî wecibeyên olî destpêkê bibin malbatan û piştre jî bibin Goristana Pakrewanan a Şehîd Berxwedan û Şehîd Dilgeş a li Çiyayê Şengalê. Cenaze wê li goristanê bi merasîmekê werin veşartin.
Cenazeyê gerîlayê HPG’ê Sîpan Hemo (Orhan Baran) jî, wê li warê wî, bajarê Qamişlo yê Rojavayê Kurdistanê bê definkirin.
