Welatiyên bajarê Girê Spî cenazeyên 17 şervanên Lîwa Siqûr El-Reqa yên ku di bin sîwaneya QSD′ê de tev digerin, bi merasîmeke girseyî li Goristana Şehîd Mehmûd Tumê veşartin.

Di merasîmê de Hevserokê Federaliya Bakurê Sûriyê, Serokê Desteya Rêveber a Kantona Kobanê Enwer Mislim, Hevserokatiya Rêveberiya Xweser a bajarê Girê Spî Zelîxe Ebdî û Hemdan El-Ebid, Fermandarê Lîwa Siqûr El-Reqa Eymen El-Xanim, şêx û rûspiyên Kurd û Ereb ên bajarê Girê Spî, nûnerên Saziyên Sivîl, şervan û gel amade bûn.

Li goristanê bi deqeyek rêzgirtinê merasîmekî leşkerî hate lidarxistin. Piştre Endamê Saziya Malbatên Şehîdan Wehîd Ebdullah axivî, sersaxî ji malbatên şervanan û tevahî Bakurê Sûriyê re xwest û got ku wan şervanan ji bo azadiya gelê xwe, canê xwe feda kirin.

Piştre Fermandarê Lîwa Siqûr El-Reqa Ebû Ednan jî axivî û şehîdên xwe wekî kulîlkên buharê û hêviyên pêşerojê bi nav kirin û soza tolhildana wan da.

Hevserokê Federaliya Bakurê Sûriyê Mensûr Selûm jî sersaxî ji malbatên têkoşeran re xwest û anî ziman ku serkeftinên ku li Bakurê Sûriyeyê pêk hatin, bi saya fedekariya şehîdan bû. Selûm soza şopandina rêya têkoşeran da.

Her wiha Serokê Desteya Rêveber a Kantona Kobanê Enwer Mislim jî sersaxî ji tevahî gelê Sûriyeyê re xwest û diyar kir ku wê ciwanên Bakurê Sûriyê têkoşîna xwe bidomînin û şopdarên hevalên xwe bin.

Piştî axaftinan nasnameyên cangoriyan hatin xwendin, radestî malbatên wan hatin kirin.

Di dawiya merasîmê de jî cenazeyên şervanan bi dirûşim û tilîliyan ve hatin veşartin.