Bi hezaran şêniyên bajarê Efrînê cenazeyê şervanê YPG′ê Mihemed Horo (Mazlûm) ku di encama topbarana artêşa Tirk a dagirker ya li ser Kantona Efrînê de jiyana xwe ji dest dabû, ji Nexweşxaneya Avirîn a bajêr wergirtin û ber bi Goristana Şehîd Refîq a li navçeya Şera ve, ketin rê. 

Li goristanê ji aliyê şervanên YPG û YPJ'ê ve merasîmeke leşkerî hat li dar xistin. Piştre Fermandarê YPG′ê Sadiq Avîdî, Endamê Meclîsa Malbatên Şehîdan Egîd Cefer û kurê apê  Şehîd Mazlûm , axivîn.

Axaftvanan sersaxî ji malbata têkoşer re xwestin û bang li ciwanên herêmê kirin ku çekê hilgirin, welatê xwe û destkeftiyên şoreşa Rojava biparêzin. Her wiha soza şopandina rêya cangoriyên azadiyê hat dayîn.
Piştre nasnameya şervanê YPG'ê hat xwendin û radestî malbata wî hat kirin.

Cenazeyê Şervanê YPG'ê Mazlûm bi tilîlî û dirûşmeyan li Goristana Şehîd Refîq hat veşartin.