Piştî çalakiyên gel ên 18'ê Kanûnê li Başûrê Kurdistanê dest pê kirin, amadekariyên ji bo hilbijartina parlamentê zêde bûn. 34 rêxistinên civakî yên sivîl beriya hilbijartinê daxuyaniyeke nivîskî dan û xwestin, lîsteyên hilbijêran ji nû ve bên amadekirin.

Di daxuyaniyê de hat ragihandin ku divê qanûna hilbijartinê bê sererastkirin û navê kesên jiyana xwe ji dest dane, yên ji parçeyên din ên Kurdistanê koç kirine û navê kesên du caran hatine nivîsandin ji lîsteya hilbijêran bên dexistin.

Li Başûrê Kurdistanê, derketibû holê ku di hilbijartina 2013'an de li Duhok û Hewlêrê bi navê 80 miriyan deng hatiye dayin, gelek deng ji carekê zêdetir hatine dayin û kesên ji parçeyên din ên Kurdistanê koç kirine weke hilbijêr hatine qeydkirin.

Di daxuyaniya hevpar de rêxistinên civakî yên sivîl ev daxwaz kirin:

1- Di bin çavdêriya parlamentê de qanûnên hilbijartinê ji nû ve bên sererastkirin

2- Qanûna hilbijartinê tavilê bê sererastkirin

3- Di pêkanîna kotayê de kesên ku kota ji bo wan hatiye diyarkirin, bi xwe dengê xwe bidin

4- Lîsteya hilbijêran li gorî sîstema biyometrîk a Iraqê were kirin

5- Eger derbasî sîstema biyometrîk nebe, divê ev werin kirin:

- Navê miriyan ji lîsteyê bên derxistin

- Navê hilbijêrên ku du caran hatine nivîsandin bên jêbirin

- Navê hilbijêrên li herêmên 'cihê nîqaşê' bên derxistin

- Navê kesên ji parçeyên din ên Kurdistanê koç kirine bên jêbirin

- Ji bo lîsteya hilbijêran û kesên roja hilbijartinê wezîfedar in dubare nebe, ji hev cuda bên amadekirin

- Yên sala 2000'î ji dayik bûne weke hilbijêr bên qebûlkirin

6- Cihê dayina dengdanê û cihê komkirina dengan bên diyarkirin

7- Pêşî li dayina dengan a elektronîk were vekirin

8- Komîsyona hilbijartinê bi rengekî adîl û profesyonel bê hilbijartin

9- Wezîfedar û hilbijêrên giştî di heman rojê de deng bidin

10- Hilbijartin li heyetên çavdêr ên navneteweyî vekirî be

11- Saziyên civaka sivîl bibin çavdêr