Li Gevera Colemêrgê di 8’ê Cotmeha 2016’an de li ser rêya Cengîz Topel ji wesayîta zirxî ya ku polîsê bi navê Î.M. diajot, gule hatibû reşandin û sivîlên bi navê Serhat Bûldan, Rahmî Safhali, Necdet Îşozu û Aydin Tumen jiyana xwe ji dest dabûn. Sivîlên bi navê Şemsettîn Kaya û Mehmet Alî Kaya jî birîndar bûbûn.

Têkildarî vê qetlîamê doz hatibû vekirin û di dozê de skandalek pêk hat.

Darizandin li Dadgeha Cezayê Giran a 3’emîn a Amedê pêk hat û li ser daxwaza parêzerên kesên hatine mexdûrkirin, ji Wezareta Karê Hundir hate pirsîn bê ka gelo têkildarî bersûc lêpirsîna îdarî vebûye yan na.

Wezaretê ji dêvila bersiva daxwaza dadgehê, belgeyên ‘serkeftin û spasnameyê’ yên polîs Î.M. şand ji dadgehê re. Gerînendetiya Giştî ya Emniyetê û Serokatiya Artêşa Giştî ev belge dane polîsê bi navê Î.M.

TEVLÎ ÊRÎŞÊN QIRKIRINÊ BÛBÛ

Wezaretê diyar kir ku Î.M. di dema êrîşên qirkirinê yê di navbera Kanûna 2015’an û Çileya 2016’an ên li Silopiya Şirnexê de ev belge stendine û pesnên ‘xizmeta’ wî da.

Fermandariya Hêzên Bejahî, Qaymeqamtiya Silopiyê û Gerînendetiya Emniyetê ya Stenbolê jî di belgeyên ku daye polîs Î.M. de pesnê wî dane, ew spas kirine û serkeftin jê re xwestine.

Î.M. piştî qetlîamê hatibû girtin, hê salek ji ser girtinê derbas nebû, hatibû tehliyekirin.