Komeleya Mafên Mirovan (ÎHD) Şaxê Amedê li ser operasyonên qirkirina siyasî yên îro daxuyaniyek da.

Di daxuyaniyê de hate bibîrxistin ku tevî Serokê ÎHD'ê yê Semsûrê Bulent Temel û endamên Şaxê wan ê Amedê, gelek parêzer û nûnerên saziyên civakî yên sivîl hatin destgîrkirin.

Di daxuyaniyê de hate gotin, "Ewlehî û azadiya mirovan ku bi destûra bingehîn û peymanên mafên mirovan ên navneteweyî hatine misogerkirin, mixanbin tên binpêkirin. Saziyên dadgeriyê ku di bin wesayeta desthilatdariya siyasî de ne, bi van lêpirsînan di feraseta edalet û hiqûqê de dibin sedema xisareke mezin.

Bi navê parêzvanên mafên mirovan em di wê baweriyê de ne ku di serî de meseleya Kurd, pirsgirêkên siyasî, aborî û çandî bi rêya diyalog û lihevkirinê çareser dibin û hate gotin, "Divê dawî li van lêpirsînan bê anîn û yên hatine destgîrkirin jî tavilê bên berdan."