Di 20’ê Tîrmehê de dewleta Tirk a dagirker gundê Perexê yê Zaxo topbaran kir û di encamê de 9 geştiyarên Ereb jiyana xwe ji dest dan û 23 kes jî birîndar bûn.

Di 22’yê Tîrmeha 2022’an de komek çalakvan û welatî, li bajarê Hewlêrê xwestin komkujiya dewleta Tirk ya li Zaxo bi çalakiyekê şermezar bikin. Lê hêzên PDK’ê nehiştin çalakiya dijî komkujiyê were lidarxistin û 5 çalakvan hatibûn destgîrkirin.

Çalakvanê bi navê Hogir Cefer Pîrbal jî hatibû destgîrkirin û nêzî 40 roj in nayê berdan. Hevrêyê Hogir ê bi navê Hevres Şiwan derbarê mijarê de ji Rojnews re axivî.

Hevres Şiwan diyar kir ku ji ber Hogir Cefer û komek çalakvanên din li dijî dagirkeriya dewleta Tirk derketine, li Hewlêrê hatin destgîrkirin. Şiwan da zanîn ku heya niha jî Hogir nehatiye berdan û got; “Hogir bi rêya peywendiyek telefonê ji malbata xwe re gotiye, dadgehê biryara berdana wî daye. Lê hêzên asayîşê astengiyê çêdikin û nahêlin werin berdan.”

Şiwan di dewama axaftina xwe got “Hogir Pîrbal kesekî bêsûc e, kesekî nîştimanperwer û welatparêz e. Wek erkek exlaqî û mirovî li dijî êriş û dagirkeriya dewleta Tirk nerazîbûna xwe anî ziman. Bêsedem nêzî 40 roj ji aliyê asayîşê ve hatiye destgîrkirin.”