Li Wargeha Penaberan a Şehîd Rûstem Cûdî (Mexmûr) Şehîd Pîran Suweyda (Çîmen Alturk) û Şehîd Diljîn Bêlatî (Zeynep Demîroglû) ku di 1’ê Mijdara 2024’an li Herêma Şehîd Delîl a Rojavayê Zapê di êrîşa dewleta Tirk a dagirker de şehîd bibûn, hatin bîranîn.

Merasîma bîranînê bi kombûna xelkê wargehê ya li Saziya Malbatên Şehîdan a wargehê bi deqeyek rêzgirtinê destpê kir. Piştî rêzgitinê li ser navê xelkê wargehê Hevşaredara wargehê Fatima Bîlen axivî.

Fatma Bîlen di kesayeta Şehîd Pîran û Şehîd Diljîn de hemû şehîdên Kurdistanê bi bîr anî û wiha peyîvî: “Em wek gelê Kurd dizanin ku em ji pêvajoyek gelek girîng derbas dibin. Îro dewleta faşîst û hevkarê xwe di asta herî jor de tinekirina Kurdan kirine hedefa xwe. Armancên hemû hevalên şehîd yek bû. Xwedî li hebûn, keramet, xaka xwe û fikirê Rêber Apo ku îro li cîhanê belavbûyî derketine. Em li ser wê fikirê dizanin îro em hene û xwedî maf in. Her wiha li dijî wê hişmediya qirêj fikirê Rêber Apo hilbijartin û şehîd bûn. Di pêvajoya ku em îro tê de ne divê her Kurdekî welatparêz, xwedî wijdan û dibêje ez ê li ser rûmeta xwe jiyan bikim, xwedî erk û berpirsyar be. Li ser rêya van şehîdan erk û berpirsyartiya ku dikeve li ser milê me ew e ku em xwedî li xeyalên wan derbikevin.”

Her wiha li ser navê malbata Şehîd Pîran jî Bedran Pîranî axivî û destpêkê xêrhatina xelkê wargehê kir û got: “Ev ne şehîdên destpêkê ne û ne yên dawî ne ku em li vê derê bibîrtînin, me bi sedan şehîd li vêderê bibîranîne hemû jî ewladên vî gelî bûn. Heval Pîran jî ciwanek yê vê wargehê bû, di perwerdeya vê wargehê de mezin bû û gihişt wê astê ku rêxisitina xwe, Serokatiya xwe û xeta xwe ya rast nas kir. Li ser şehîdan em çi bêjin kêm e, gotin têrê nake. Her ciwanekî ku berê xwe dide çiyayên azad yan jî berxwedana li dijî dijmin, van tiştan hemûyan dixin ber çavên xwe û wisa diçin. Em dibînin îro li Rojavayê Kurdistanê û her çar aliyên Kurdistanê, şerekî pir giran heye û em di ferqa vê de ne. Wek malbat em soz didin heta dawiyê li ser xeta hemû şehîdên Kurdistanê û li ser Paradîgmaya Rêber Apo bimeşin. Ji bo vê jî em dibêjin serê malbatên me, serê Serokatiya me, serê tevahî rêhevalên wan û tevahî gelê wargehê sax be.”

Piştî axaftina mamê Şehîd Pîran, Bedran Pîranî şehadetnameya Şehîd Pîran (Çîmen Alturk) radestî dayîka wê hat kirin.

Herî dawî jî li ser navê Saziya Malbatên Şehîdan Mamoste Hiseyîn Kara axivî. Kara di serî de sersaxî ji bo her du malbatan xwest û wiha axivî: “Wargeha Mexmûr bi şahadeta van hevalan carek din rûmeta xwe bilind kir. Heta ku gelê Mexmûr xwedî van kesayetên wisa be, wê xwedî vê rûmetê bin. Bi vê boneyê bila dijmin baş bizanibe, Mexmûr bi bedeldayînê teslîm nabe, berovajî îradeya wan wê xurt bibe û welatparêziya wan dê pêşbikeve. Li ser vê bingehê bi taybet serê malbata me ya hêja ya ku di van çil salan de di vê şoreşê de gelek bedel dane sax be, bi taybet serê rêhevalên wan yên ku îro di bin şertên herî zor û zehmet de li hemberî faşîzma dewleta Tirk di nava berxwedanek bêhempa de be sax be. Her wiha serê Rêbertiya me ya ku ev 26 sal in li hemberî hemû çewisandin û êrişan di nava berxwedanek bêhempa de ye û îro paradîgmaya wî belavî hemû cîhanê bûye û bûye hêviya hemû gelên bindest sax be. Em sebrê ji malbata hêja re dixwazin.”

Piştî axaftinan, merasîma bîranînê bi dirûşmeyên “Şehîd Namirin”, “Bijî Serok Apo”, “Jin Jiyan Azadî” bi dawî bû.