Endama Fermandariya Giştî ya YPJ’e Newroz Ehmed beşdarî kanala JIN TV’yê bû û derbarê 4’ê Nîsanê rojbûna Rêber Apo de, avabûna YPJ’ê û her wiha geşedanên li herêma Rojhilata Navîn û Sûriyeyê nirxandin kir.

ARMANC Û PÊVAJOYA AVABÛNA YPJ’Ê

Newroz Ehmed bi wesîleya 12’emîn salvegera avabûna YPJ'ê axivî û diyar kir ku serhildanên gel ên di sala 2011'an de li Tûnisê dest pê kirin, bandor li Sûriyeyê jî kir. Newroz Ehmed, da zanîn ku rêjîma Sûriyê bi têgihîştina yek netew, yek ziman û yek nasname tevdigeriya û got, “Ev di hemû gelan de nerazîbûnek ava dikir. Bi taybetî li Sûriyeyê gelê Kurd jî dibin vê pença qirkirinê de bûn. Her wiha polîtîkaya qirkirina çand û ziman li tevahi Kurdistanê dihat meşandin. Li dijî van polîtîkayên qirkirinê gelê Kurd bi salane têdikoşin û xwe rêxistin dikirin. Ev têkoşîn bê guman bandora xwe li ser Rojavaye Kurdistanê û Sûriyeyê jî kir.”

Newroz Ehmed, da zanîn ku azadiya jin tê wateya azadiya civakê û destnîşan kir ku di wê pêvajoyê de bi taybetî gelê Kurd û jin di bin xeteriyeke mezin de bûn û got li dijî polîtîkayên asîmîlasyonê têkoşîneke rêxistinkirî meşandin.

Newroz Ehmed, bal kişand ser pêvajoya avabûna YPJ'ê û got ku jinan di dîrokê de li ber xwe dane, lê ev yek veneguheriye hêzeke rêxistinkirî. Newroz Ehmed, anî ziman ku YPJ'ê xwe li ser esasê parastina cewherî ya jinan bi rêxistin kir û got ku ne tenê hêza parastina neteweyî û herêmî, hêzeke têkoşînê ye ku hemû jinan di nav xwe de dihewîne.

ROLA JINAN DI QADA LEŞKERÎ Û SIYASÎ DE

Newroz Ehmed, da zanîn ku di dîrokê de şer bi zîhniyeta serdest a mêr hatiye meşandin û jin tenê bûne xwedî rolên piştevaniyê. Newroz Ehmed, diyar kir ku YPJ’ê rêxistineke ku hem di şer de hem jî di pêşxistina stratejî û taktîkan de bûye pêşenga tevahiya jinan.
Newroz Ehmed, destnîşan kir ku YPJ’ê bi taybet di şerê li dijî DAÎŞ’ê de roleke mezin lîstiye û got ku ev têkoşîn bandor li tevahiya cîhanê kiriye. Newroz Ehmed, diyar kir ku YPJ’ê di berxwedana Kobanê û Şengalê de, ne tenê bû hêza têkoşîna li dijî DAÎŞ’ê, di heman demê de bû sembola azadiya jinê. Newroz Ehmed, anî ziman ku şervanên YPJ’ê ne tenê têkoşîna leşkerî meşand, di heman demê de xwe bi rêxistin kirin û parastina xwe ya cewherî pêş xistin.

SIBEROJA SÛRIYEYÊ Û ROLA JINAN

Newroz Ehmed, diyar kir ku li Sûriyeyê amadekariyên makezagoneke nû dewam dikin û got, sîstemeke ku jin di vê pêvajoyê de cih negire, tê wateya ji nû ve hilberandina zihniyeta serdest a mêr û got, “Têkoşîna jinan ne tenê ji bo mafên takekesî, ji bo avakirina civakek demokratîk jî girîng e.”
Newroz Ehmed, da xuyakirin ku têkoşîna YPJ'ê ne tenê bi qadên şer ve sînordar e û got ku YPJ’ê di heman demê de ji bo azadiya civakî û mafên jinan têdikoşe. Newroz Ehmed, her wiha diyar kir ku sîstema nû ya li Sûriyeyê bê avakirin, divê avahiyeke demokratîk ku jin û hemû gelan tê de cih bigire be.

RAMANÊN RÊBER APO Û TÊKOŞÎNA YPJ’Ê

Newroz Ehmed anî ziman ku peyama Rêber Apo yê 8’ê Adarê û banga ‘Aştî û Civaka Demokratîk’ ji bo jinan weke manifestoya azadiyê ye û got, “Diyariya herî mezin a vê pevajoyê ji bo hemû jinan peyam û silavên Rêber Apo bû. Hebûna jinê di nava civaka demokratîk de gengaz e. Ji ber ku di feraseta netewperest de jin tune hat hesibandin, di dirokê de her bi şer re rû bi rû ma. Di nava vê dirokê de jinan ji ber şer êşen mezin jiyan û di nava van şeran de berdelên mezin dan. Bangawaziya Rêber Apo ya ji bo aştiyê û civaka demokratîk bi pêşengiya jina ku xwe rêxistin kiriye re gengaz e. Di heman demê de pêwîste em rêxistinbûna xwe xurttir bikin, ji ber ku weke jin li ser me xeteriya mezin xwe didomîne. Ji ber vê peyama Rêber Apo di vê pevajoyê de ji bo jinan tê wateya manîfestoya azadiye ye.”

Newroz Ehmed, anî ziman ku ew tesbîta Rêber Apo ya "Azadiya jinê azadiya hemû civakê ye" diparêzin û got ev perspektîf bûye bingeha avakirin û têkoşîna YPJ'ê.

Newroz Ehmed diyar kir ku ew 4’ê Nîsanê rojbûna Rêber Apo weke sembola têkoşîna azadiya jinê dibînin û destnîşan kir ku ew ê têkoşîna xwe hîn mezintir bikin. Newroz Ehmed, diyar kir ku YPJ’ê li gorî fikrên Rêber Apo têkoşîna xwe ya azadiyê didomîne û got ku YPJ’ê misogerkirina azadiya fîzîkî ya Rêbertî jî parçeyek ji vê têkoşîna xwe dibîne.

Newroz Ehmed, di dawiya axaftina xwe de diyar kir ku têkoşîna YPJ'ê bi destkeftiyên jinan mezin bûye. 

Newroz Ehmed da zanîn ku şervanên YPJ'ê bi fedekariya jinên leheng ên weke Arîn Mîrkan, Avesta Xabûr, Barîn Kobanê û Silava gihiştine vê astê û diyar kir ku YPJ’ê wê têkoşîna azadiya jinê biparêze û berfireh bike û li gorî fikrên Rêber Apo şoreşa jinê hîn xurtir bike.