Di meşan de bang û dirûşmeyên jinan li dijî siyaseta dewleta Tirk a dagirker a li dijî sivîlan hatin berizkirin û binpêkirin û tundiya ku li ser jinên li herêmên dagirkirî tê ferzkirin, hate şermezarkirin.

QAMIŞLO

Şêniyên bajarê Qamişlo li çerxerêya Şehîd Osman Sebrî (Qermûtî) kom bûn û meşek lidar xistin. Di meşê de dirûşmeyên pêkanîna azadiya jinê hatin berzkirin û pankartên “Erê ji îradeya jinê re”, “Na ji tundiya li dijî jinan re”, “Hevrîn sembola yekitiya jinê ye” û wêneyên şehîdên jin ku ji aliyê çeteyên dewleta Tirk ve li herêmên Bakur û Rojhilatê Sûriyê şehîd bûne hatine hildan.

Meş li çerxerêya Şehîd Rûbar a li pêşiya navenda Mihemed Şêxo ya Çand û Huner veguherî mitîngî. Di mitîngê de ji rêveberên Kongreya Star a kantona Qamişlo Şaha Xelîl axivî, hemû cûreyên tundiya li dijî jinan şermezar kir û wiha domand: “25’ê Mijdarê bûye roja berxwedan û têkoşîna jinê. Di vê rojê de jinê tundiya li dijî xwe red kir û di kesayeta xwişkên Mîrebal de ev yek eşkere bû.”

Şaha Xelîl piştrast  kir ku têkoşîn û berxwedana jinan ji wê demê û heta roja îro didome û ji ber vê yekê jî NY’yê ev roj weke Roja Têkoşîna li dijî Tundiya li ser Jinan a CÎhanê ragihand.

Şaha bal kişande ser rola jinê ya di şoreşa Rojavayê Kurdistanê de û got: “Ji ber rola jinan, Zehra û Hevrîn bûn hedefên dewleta Tirk a dagirker.”

AMÛDÊ

Li navçeya Amûdê jî şêniyên bajar, endamên saziyên sivîl û jinan ên Rêveberiya Xweser berê xwe dan Qada Şehîd Cîhad û meşek lidar xistin.

Di meşê de dirûşmeyên banga rawestandina tundiya li dijî jinan hate berzkirin.

Meş li Qada Jina Azad veguherî mitîng. Di mîtîngê de ji rêveberên Kongreya Star a navçeyê Mura Zoro wiha axivî: “Emê vê rojê veguherînin roja berxwedan û serkeftina hemû civakan li hember hêzên kapîtalizim û dagirkeran.”

Mura Zoro wiha domand: “Ji bo em tundiyê tune bikin û azadiya xwe bidest bixin divê em bi yek destî li hember hemû siyaset û binpêkirinên li dijî jinan bisekinin. Ji ber bi rêxistinkirina jinan azadiya hemû gel û civakan tê bidestxistin.”

TIRBESPIYÊ

Her wiha jinên navçeya Tirbespiyê bi heman armancê meşek lidar xistin. Meş ji pêşiya navenda Kongereya Star a navçeyê dest pê kir.

Meş li pêşiya navenda navçeyê veguherî mitîngê. Di mitîngê de Hevseroka Meclisa bajarokê Hilwa Fehîma Temo wiha axivî: “Dewleta Tirk a dagirker jinên herêmên Bakur û Rojhilatê Sûriyê dike hedef û armanca wê ji vê yekê ewe ku îradeya civakê bişkîne.”

Fehîma Temo piştrast kir ku ew ê parastina mafên jinan bikin.

ÇIL AXA

Di heman çarçoveyê de, bi sedan şênî û pêkhateyên navçeya Cilaxa ya kantona Qamişlo li dordora çarxerêya şehîd Mehsûm a navenda navçeyê kom bûn û dest bi meşê kirin.

Meş li ber garacê veguherî mîtîngê. Piştre yek ji rêveberên Ofîsa Jinan a Meclisa Sûriyeya Demokratîk Daliya Henan axivî û her sê xwişkên Mîrabal ên ji bo azadiya jinê xwe fedayî kirine bi bîr anî.

Daliya Henan diyarkir ku di civakên ku jinê birêve dibir, tê de ewlehî, hezkirin û wekhevî hebû, lê zihniyeta desthilatdar ev ji holê rakir û civak ber bi zilm û neheqiyê ve birin.

GIRKÊ LEGÊ

Li navçeya Girkê Legê jî, meş ji Qada Şehîd Xebat Dêrik destpêkir û bi berzkirina diruşmeyên silavkirina berxwedana jinan li kolana sereke ya navçeyê geriyan.

çalakvanan li navenda navçeyê rawestiyan. Piştre yek ji rêveberên Kongra Star a navçeyê Semîra Yûsif axivî û got: “Em wek jinên Bakur û Rojhilatê Sûriyê li pêşiya komployên navneteweyî yên ku em kirine hedef sekinîn.”

Semîra Yûsif  bal kişande ser fikr û felsefeya Rêberê Gelê Kurd Abdullah Ocalan û wiha dom kir: “Me hêza xwe ji fikir û felsefeya Rêber Abdullah Ocalan girt û ew ji bo rizgarkirina jinê têkoşiya. Lewra şoreşa Bakur û Rojhilatê Sûriyê wekî şoreşa jinê hate pênasekirin.”

TIL KOÇER

Bi sedan şêniyên navçeya Til Koçer jî tevlê meşê bûn. Meş ji baxçeya Rêberê Gelê Kurd Abdullah Ocalan destpêkir û li kolana sereke ya navçeyê dewam kir.

Meş li navenda navçeyê veguherî mîtîngê, piştre li ser navê Kongreya Star Semîra Metreda got: “Em ji tundiya li ser jinan re dibêjin na, ji ber ku ew damarên jiyanê ne.”

DÊRIK

Li navçeya Dêrikê bi sedan şêniyên navçeyê tevlê meşê bûn. Meş ji Qada Azadî destpê kir, li sûka navendî geriya û li Qada Jina Têkoşer veguherî mîtîngê. Yek ji rêveberên Kongreya Star Fatma Silêman got ku heta rizgarikirina ji dagirkeriya dewleta Tirk divê jin li qadan û li eniyên şer helwesteke yekgirtî nîşan bidin.

Piştre li ser navê Yekîtiya Suryanî Corcêt Îbrahîm diyarkir ku armanca Tirkiyê dagirkirina tevahî Bakur û Rojhilatê Sûriyê û qirkirina gelên wê ye. Her wiha destnîşan kir ku divê li hemberî êrişên dewleta Tirk berxwedan bê bilindkirin.

TIL BIRAK

Di heman çarçoveyê de, şêniyên navçeya Til Birak bi meşekê tundiya li ser jinê şermezar kirin. Meş ji çarxerêya firnê ya bakurê navçeyê destpêkir.

Ji rêveberên Kongreya Star a navçeya Til Birakê Henan Silêman anî ziman ku pirsgirêka herî mezin a li pêşiya civakê, şideta li dijî jinê ye.

TIL HEMÎS

Li Til Hemîsê, şêniyên navçeyê bi meşekê rola jinê ya di avakirina civakê û îradeya wê de piştrast kirin.

Meş ji navenda trafîkê destpêkir û li kolanên sereke yên navçeyê geriya.

Li ser navê Kongreya Star a navçeya Til Hemîsê Nîra El-Hemko axivî û bal kişande ser berdewamiya zihniyeta baviksalarî li piraniya civakan û girîngiya têkoşîna jinan a ji bo tunekirina vê zîhniyetê.

Her wiha endama PYD'ê Seher El-Birho jî tundiya li ser jinê şermezar kir û soza domandina rêya şehîdan da.

Mîtîng  bi berzkirina dirûşmeyên girêdayî yekîtiya gelan û azadiya jinan bi dawî bû.

HESEKÊ

Bi boneya 25’ê Mijdarê li bajar û navçeyên kantona Hesekê ya herêma Cizîrê ya Bakur û Rojhilatê Sûriyê jî meş hatin lidarxistin.

Çalakvanan pankartên “Na ji tundiya li dijî jinan re”, “Aştî mafê her kesî ye” û “Ji bo têkbirina tundî û dagirkeriyê têbikoşe” û wêneyên şehîdên ku ji bo azadiyê canê xwe feda kirine, hatin hildan.

Meş ji pêşiya navenda Heyva Sor a Kurdî ya li taxa Til Hecer destpêkir û  li navenda rêveberiya herêmê veguherî mîtîngê.

Di mîtîngê de endama Koordînasyona Kongreya Star a Rojava Rîhan Loqo axivî û bal kişand ser tundiya li ser jinan û wiha got: “Tundiya ku îro li dijî jinan tê kirin mîrata bi hezerên salan ji zihniyeta desthilatdare.”

Rîhan Loqo diyarkir ku jin li Bakur û Rojhilatê Sûriyê xwedî cih û pîvan e, ji bo maf û erkên xwe têdikoşe.

Di dawiyê de şanoya têkildarî tundiya li ser jinan ji aliyê Tevgera Kevana Zêrîn hate pêşkêşkirin.

Her wiha Meclisa Jinan a Olî daxuyaniyek da. Daxuyanî li navenda saziya civaka olî ya bajar ji aliyê rêvebera Meclisê Xulûd Ebdo ve hate xwendin. Di daxuyanyê de binpêkirin û zilma li ser jinê hate şermezarkirin.

Her wiha hate destnîşankirin ku ola Îslamê girîngî daye jinê û cihê wê bilind kiriye û hate gotin, jin jiyan û civak bi xwe ye.

Li kampa Waşûkanî û Serêkaniyê jî koçberên herêma Serêkaniyê ji pêşiya rêveberiya her du kampan dest bi meşê kirin. Meş li deriyê veguhestinê yê her du kampan veguherî mîtîngê. Di mîtîngê de daxuyaniyek têkildarî Roja Têkoşîna li dijî Tundiya li ser Jinan a CÎhanê hate dayîn.

Di daxuyaniyê de hate diyarkirin ku tundiya li dijî jinan tê kirin encama zihniyeta desthilatdar a 5 hezar salî ye û dewleta Tirk li herêmên dagirkirî vê yekê bikar tîne û armanca wê ji vê yekê eve ku rola jinê li Bakur û Rojhilatê Sûriyê tune bike.

Her wiha hate piştrastkirin ku dewleta Tirk û çeteyên wê li dijî siyasetmedar Hevrîn Xelef, Saed û Hindê sûc pêkanî, her wiha sûcê li dijî Barîn Efrîn ku mînaka herî ber çav e ku nîşan dide dewleta Tirk sûcan pêk tîne.

ŞEDADÊ

Li navçeya Şedadê jî bi sedan şêniyên herêmê û gundên başûrê Hesekê Erîşe, Ebidan, Deşîşa, Mergeda û Şedadê ji pêşiya meclisa navçeya Şedadê dest bi meşê kirin. Meş li qada ciwanan bi daxuyaniyekê bi dawî bû. Endama Kongreya Star Reşa El-Xilêf daxuyanî xwend.

Di daxuyaniyê de hate destnîşankirin ku êşa her jinekê li cîhanê, êşa hemû jinan e û diyarkir ku xwişkên Mîrabal sembola hêzê û berxwedana li dijî dîktatoriyê û zilmê ne.

Di daxuyaniyê de her wiha bang li jinan hate kirin ku jinên pêşeng wekî Sakîne Cansiz, Fîdan, Leyla, Hind Seda û Hevrîn Xelef yên li hemberî dagirkeran û çeteyan sekinîne, ji bo xwe bikin nimûne.

TIL TEMIR

Li Til Temirê jî meşê ji kolana sereke destpêkir û li kolana Filistîn a li naverasta navçeyê rawestiya. Li wir endama Koordînasyona Kongreya Star Welîda Botî axivî û piştrast kir ku destketiyên li Bakur û Rojhilatê Sûriyê hatine bidestxistin, encama berxwedana jinan e.

Welîda Botî tekez kir ku azadiya jinan li Bakur û Rojhilatê Sûriyê, azadiya fikir û biryarê ye û wiha dewam kir: “Em ji bo vê yekê kar dikin, em ê hemleyên xwe yên ji bo pêkanîna azadiya fîzîkî ya Rêber Ocalan ku ji bo jinan têdikoşe, dewam bikin û em ê parastina jinan û civakê dewam bikin.”

DIRBÊSIYÊ

Şêniyên navçeya Dirbêsiyê jî bi heman armancê meşek lidar xistin. Meş ji çerxerêya Jina Azad destpêkir û li pêşiya navenda Kongreya Star veguhirî mîtîngê.

Di mîtîngê de Berdevka Kongreya Star a Rojava Remziya Mihemed axivî û bal kişand li ser berdewamiya têkoşîna jinan li Bakur û Rojhilatê Sûriyê li dijî tundiya ku li dijî wan tê kirin nexasim li herêmên ku ji aliyê dewleta Tirk û çeteyên wê ve hatine dagirkirin, kir.

Remziya Mihemed destnîşan kir ku Kongreya Star li tevahî cîhanê bûye nimûne ji ber ew li ser esasê rêxistinkirina jinên Ereb, Suryan û Kurdan hatiye avakirin û li gorî sîstema ku mafên wan diparêze. Remziya di axaftina xwe piştrast kir ku îro jin li Bakur û Rojhilatê Sûriyê nîqaşan ji bo çareserkirina aloziya Sûriyê dike û ev hemû encamên têkoşîn û serketinê ye.

HOL

Şêniyên navçeya Holê û gundewarên wê li dijî tundiya li ser jinan meşek lidar xist. Meş ji pêşiya navenda Kongreya Star a navçeyê dest pê kir û ber bi deriyê bakur ê navçeyê ve çû.

Meş li deriyê bakur ê navçeyê veguhirî mîtîngê. Di mîtîngê de Endama Kongreya Star a navçeya Holê Sacîda Abdullah îşaret bi têkoşîna jinê heta pêkanîna azadiyê û rizgarkirina civakê ji zihniyeta desthilatdar kir.

Her wiha endama PYD’ê Mehanî El-Ehmed jî bang li hemû jinên cîhanê kir ku di yek rêzê de bisekinin û li ber xwe bidin heta ku azadiya jin û civakê bidest bixin.