Fermandariya Yekîneyên Jinên Şengalê di yekemîn salvegera êrîşa 3’yê Adara 2017’an de,  ya PDK’ê ya li ser Xanesorê daxuyaniyek weşand. Fermandariya YJŞ’ê şehîdên 3’ê Adarê bi rêzdarî bibîranî û soz da ku rêya şehîdan bişopîne.

Di daxuyaniyê de hate gotin piştî fermana 3’yê Tebaxa ya 2014’an ya di plansaziya dewleta Tirk û hevkariya PDK’ê pê hatiye jinan û gelê Êzîdî yekîneyên parastinê û hêza xwe ya gewherî ava kirin. YJŞ’ê êrîşa 3’yê Adarê êrîşeke weke êrîşa li dijî vîn û hêza gewherî ya jina rêxistinbûyî ya gelê Êzîdî nirxand û got êrîşa 3’yê Adarê ji fermana 3’yê Tebaxa 2014’an ne qut e, berdewamiya vê fermanê ye.

YJŞ’ê got armanca vê êrîşê hêza parastina gel, vîn û xwesteka xweseriyê ye û pê hatiye xwestin ku nasnameya resen û vîna gel were tinekirin. YJŞ’ê bi berdewamî bal kişande ser hewlwesta dayik, gel ya li dijî vê êrîşê û got, ‘’bû îfadeya şênber ya ku wê jinên Êzîdî li Şengalê ti carî rê nedin xiyanetê’’.

YJŞ’ê di şexsê Nûjiyan Erhan, Nazê Naîf, Têkoşîna Serhed de şehîdên Xanesorê bi bîr anî û got, ‘’Vîna gelê me ti caran wê neyê teslîmgirtin, bi şehîdxistina wan xeyalên wan ên jiyana azad û xeser hatiye hedefkirin.’’

YJŞ’ê herî dawî got ew hêzên çekdar ên jinên Êzîdî li dijî êrîşan wê li ber xwe bidin û li dijî her cure xiyanetê têkoşînê geş bikin û got, ‘’Li ser vê bingehê di şexsê Şehîd Têkoşîna, Nûjiyan û Nazê Naîf de hemû şehîdên 3’yê Adara 2017’a bi rêzdarî û minet ib bîr tînin û bi biryardariyeke qeyîm, bi rênedana xeta xiyanetê em ê alaya têkoşînê ya ku şehîdên me rakiriye bilindtir bikin. Careke dî em diyar dikin, li hemberî êrîşên wiha em ê zêdetir rêxistiniya xwe bikin, bi bîr û baweriyeke xurtir, bi vîneke mezintir têkoşînê geş bikin û tola xwe hilînin.’’