Ofîsa RJAK'ê ya li Silêmanî li dijî tecrîda li ser Rêberê Gelê Kurd Abdullah Ocalan û bi mebesta desteka li çalakiya greva birçîbûnê  ya Parlamentera Colemêrgê ya HDP'ê Leyla Guven, greva birçîbûnê da destpêkirin.

Çalakiya greva birçîbûnê bi dirûşma, ''Em ê pergala Imraliyê hilweşînin, bi Rêber Apo re bi azadî bijîn'' dest pê kir û ji gelek deveran gelek kes tevlî greva çalakiyê bûn.

'ÇARESERÎ BI RÊBER APO PÊKAN E'

Banû Helepçeyî ku li ser navê RJAK'ê daxuyanî xwend, wiha got:

''Li ser Rêber Apo tecrîd heye û em ti agahiyê jê nastînin. Krîza Rojhilata Navîn ku her diçe girantir dibe ji tecrîda li ser Rêber Apo dixwe. Çareseriya pirsa Kurd û avakirina pergala demokratîk bi Rêber Apo pêkan e. Hevseroka KCD'ê û Parlamentera HDP'ê ya Colemêrgê Leyla Guven li dijî tecrîdê ev 34 roj in greva birçîbûnê daye destpêkirin. Em bang li hemû gelên xwedî wijdan ên li çar parçeyên Kurdistanê û cîhanê dikin û dibêjin, ''Em hemû Leyla Guven in'' û li dijî tecrîda li ser Rêber Apo bêdeng nemînin.''