MOSKOVA

Kurdistaniyên li paytexta Rûsya Moskova dijîn Newroz pîroz kirin. Pîrozbahî li eywana Konserê ya Kosmos bi deqeyek rêzgirtinê destpê kir. Li vir Serokê Otonomia Çand-Netewî ya Ferderal a Kurd a Federasyona Rûsya Ferhat Paîyev axivî û diyar kir ku Newroz ji bo Kurdan tê wateya azadî û vejînê.

Hevseroka Tevgera Jinên Kurd a Navneteweyî (TJKN) Tara Qadir jî Newroza Rêberê Gelê Kurd Abdullah Ocalan û gelê Kurd pîroz kir û got: “Heta Rêberê Gelê Kurd Ocalan azad nebe wê tu Kurd azad nebe.”

Pîrozbahî heta saetên direng dom kir û bi gerandina govendê û dirûşman bi dawî bû.

KRASNADOR

Kurdên li Platnîrovskyî ya herêma Krasnodar a Rûsyayê jî agirê Newrozê pê kirin. Kurdistaniyên ku li ber def û zirneyê govend li dorî agir gerandin, li ser navê Meclîsa Kurd a Platnîrovsky Nadîre Çerkez û Refîk Babayev diyar kir ku hêvî dikin ku agirê Newrozê ji bo Rêberê Gelê Kurd Abdullah Ocalan û gelê Kurd bibe agirê azadiyê.

SARATOV

Kurdên li gundê Tîmûnîno ya navçeya Dargaçî ya herêma Saratovê jî Newroz pîroz kirin. Li ser navê çalakvanan Îsmaîl Yûsûbov û Îbo Yûsûbov axivî û diyar kirin ku ji bo azadiya Rêberê Gelê Kurd Abdullah Ocalan divê berxwedan bê mezinkirin.