Koma Partiya Keskan a Meclîsa Federal a Elman serlêdan kir, ku di rûniştina taybet a vê hefteyê de bûyerên dawî yên li Tirkiyeyê bê nirxandin. Partiya Keskan xwest, rûniştin bi sernavê "Li Tirkiyeyê êrişa li ser mafên mirovan û encamên vê yekê ji bo siyaseta Elman û Ewropayê" bê lidarxistin.

Ji rêveberên Koma Meclîsa Federal a Keskan Britta Hasselmann li ser mijarê serlêdan kir û anî ziman ku bi fermana Erdogan rojên dawî li Tirkiyeyê kiryarên antî-demokratîk zêde bûne. Hasselmann bi bîr xist, dadgeriya ku ji aliyê Erdogan ve tê kontrolkirin doza girtinê li HDP'ê vekiriye û piştre jî Tirkiye ji Peymana Stenbolê hatiye derxistin. Hasselmann ji hikumeta Elman a Federal xwest, ku êdî ber dilê Tirkiyeyê bes xweş bike, ku Tirkiye gav bi gav otorîter dibe.

Parlamentera Partiya Keskan Hasselmann diyar kir, ji bo Tirkiye demokratîk bibe û aştî lê bi cih bibe, divê hikumeta Elman helwesteke zelal destnîşan bike û got, "Divê êdî Hikumeta Federal hişyariyê bide Tirkikyeyê ku kiryarên antî-demokratîk ên dibe sedema binpêkirina mafên mirovan wê bibin sedema pêkanînên Yekîtiya Ewropa û Konseya Ewropayê."