Şervanê Hêzên Sûriyeya Demokratîk (QSD) Pêşeng Elîko yê 19'ê Nîsanê li herêma Tirwaziyê di êrişa hewayî ya dewleta Tirk a dagirker de şehîd bû, li bajarê Leipzig ê Elmanyayê hate bîranîn. Di bîranînê de kekê Pêşeng Elîko Arîf Elîko jî hate bîranîn ku sala 2018'an li Efrînê şehîd bû.

Li gel malbat û xizmên Elîko gelek kes beşdarî bîranînê bûn. Çalakiyê bi deqeyeke rêzgirtinê ya ji bo bîranîna şehîdan destpê kir.

Bi navê KOMAW'ê axaftin hate kirin û di şexsê Sirri Sureyya Onder de hemû şehîdên meha Gulanê hatin bîranîn.

Hevserokê FED-KURD'ê Menderes Canbeg jî anî ziman ku ew bi Şoreşa Rojava re hebûn, yekîtî û têkoşîna xwe dewam dikin û ev yek jî bi saya şehîdan pêk hatiye.

Di bîranînê d sînevîzyonek li ser jiyana herdu birayên Elîko û têkoşîna wan hate nîşandan.

PARIS

Li banliyoya Melun a paytexta Fransa Parisê li Navnda Civaka Demokratîk a Mehmet Tûnç di şexsê Sirri Sureyya Onder de şehîdên meha Gulanê hatin bîranîn.

Piştî deqeyeke rêzgirtinê siyasetmedar Fesîh Varto axivî û qala girîngiya şehîdên meha Gulanê di nava têkoşîna azadiyê ya Kurdan de kir.

Ji Tevgera Ciwanên Şoreşger a Fransayê Mûrat Mawa jî got, bi dirûşma 'Me bi ciwantî destpê kir, em ê bi ciwantî bi ser bikevin' wê bîranîna şehîdên meha Gulanê bi ser bixînin.

Di bîranînê de sînevîzyona li ser Şehîdên Meha Gulanê hate nîşandan û dirûşma 'Şehîd namirin' hate qîrîn.

BODENSEE

Li bajarê Bodensee yê Elmanyayê ji bo Dilsoz Sarya (Îslam Çelîk) çalakiya bîranînê hate lidarxistin ku sala 2019'an li navçeya Kemah a Erzînganê li gel du hevalên xwe şehîd bû.

Di çalakiyê de ku gelek kes amade bûn sînevîzyona li ser jiyan û têkoşîna Dilsoz Sarya hate nîşandan.