Li gelek bajarên Ewropayê bêdengiya li dijî berxwedana grevên birçîbûnê yên li dijî tecrîdkirina Rêberê Gelê Kurd Abdullah Ocalan bi pêşengiya Hevseroka KCD û Parlamentera HDP’ê ya Colemêrgê Leyla Guven tê kirin, bi çalakiyan tê protesto kirin.

PARÎS

Li paytexta Fransa Parîsê Kurdistanî û dostên wan bêdengiya welatên Ewropa ya li dijî grevên birçîbûnê bi çalakiyekî bêdeng protesto kirin.

Çalakî saet 14:00’an li pêşiya kûleya Eîffel li qada Trocadero ya Parîsê ji bo bîranîna şehîdên têkoşîna azadiyê bi deqîqeyek rêzgirtinê destpê kir.

Di çalakiyê de pankarta “Ji Ocalan re azadî” û “Em hemû Leyla ne” hate hildan. Nûnerên ACTÎT, nûnerê Partiya Komunîst a Fransayê Pascal Torre û  Ozkan Ozdemîr ê ji 1’ê Nîsanê ve di greva birçîbûnê ya bêdawî-bêdorveger de ye piştgirî dan çalakiyê.

Beriya çalakiyê berxwedêrê greva birçîbûnê Ozkan Ozdemîr axivî û got; “Weke sosyalîstekê ez birûmet û serbilind im ku beşdarî greva birçîbûnê bûme. Baweriya min heye ku wê berxwedana me encam bigre. Em ê tecrîdê bişkînin faşîzmê têk bibin.”

Çalakiya protestoyê nêzî du saetan dom kir û çalakî bi dirûşmeya “Ji Ocalan re azadî” bi dawî bû.

RENNES

Li bajarê Rennes a Fransayê jî çalakiya bêdeng hate lidarxistin. Girse li Qada Şaredariya Rennesê li hev civiyan û bi banda reş devê xwe girtin. Çalakî ji aliyê endamên Navenda Civaka Demokratîk a Kurd û Komeleya Jinan a Zîn ve hate lidarxistin û di çalakiyê de bêdengiya welatiyên Ewropayê hate protesto kirin.

Di çalakiyê de belavokên têkildarî daxwazên berxwedêrên greva birçîbûnê jî hatin belav kirin.

KOLN

Li bajarê Koln a Elmanyayê jî Kurdistaniyan li Dêra Domê çalakiyek lidarxist.

Kudistanî saet 14:00’an li hev civiyan, bi banda reş devê xwe girtin û bêdengiya Ewropa ya li dijî tecrîdkê protesto kirin. Ji bo 7 hezar çalakgerên greva birçîbûnê weke sembolîk 70’î kesan xeleka ji mirovan pêk tê avakirin û wêneyên berxwedêrên greva birçîbûnê hildan..

MANNHEÎM

Li bajarê Elmanya Mannheîmê li pêşiya HBF çalakiyek bêdeng hate lidarxistin. Girseya gel seat 14:00’an li hev civiyan, belavok belavkirin û xwendin. Girseya gel bi banda reş devê xwe girtin, CPT û AKP protesto kirin.

STÛTTGART

Li bajarê Elmanya Stûttgartê Kurdistanî li Rotebuhlplazê li hev civiyan û bêdengiya Ewropayê protesto kirin.

Di çalakiyê de hate diyar kirin ku greva birçîbûnê ya bi pêşengiya Leyla Guven di qonaxekî metirsîdar de ye û banga xwedî derketinê hate kirin. Di çalakiyê de wêne û pankartên girêdayî Ocalan û Leyla Guven hate hildan.

Di çalakiyê de belavokên têkildarî grevên birçîbûnê hatin belav kirin.