Li bajarê Dusseldorfê yê Elmanyayê şoreşgerên jin Sakîne Cansiz, Fîdan Dogan û Leyla Şaylemez ên ku di 9’ê Çileya 2013’an de li Parîsê hatibûn qetilkirin û endama Meclîsa DBP’ê Sêvê Demîr, endama KJA’yê Fatma Ûyar û Hevseroka Meclîsa Gel a Silopiyê Pakîze Nayir ên ku di 5’ê Çileya 2016’an de li Silopiyê hatibûn qetilkirin û di şexsê Ahmet Kiliç (Mûrat Dep/Mele Mûrat) ê ku di bombebarana dewleta Tirk a li dijî Herêmên Parastinê yên Medyayê de şehîd bûbû, şehîdên meha Çileyê hatin bibîranîn.

Di bibîranînê de siyasetmedar û rojnameger Gonul Kaya axivî. Kaya got ku, dema bi Rêberê Gelê Kurd Abdullah Ocalan re li ser pêvajoya ‘çareseriyê’ hevdîtin dihate kirin Qetlîama Parîsê hatiye kirin û got ku “6 sal ji ser qetlîamê derbas bû. Derket holê ku ev qetlîam ji aliyê MÎT’ê hatiye kirin lê dewleta Tirk daxwaza edaletê ya Kurdan bi cih neanî. Em ê heta dawiyê şopdarê vê dozê bin.”

Kaya qala greva birçîbûnê ya ji bo rakirina tecrîda li ser Rêberê Gelê Kurd Abdullah Ocalan jî kir û got ku, “Çalakiya greva birçîbûnê bi kesekê hate destpêkirin lê bi tevlêbûna bi sedan kesan didome. Bêdengiya Konseya Ewrûpayê û ya CPT’ê nayê qebûlkirin. Ev grevên birçîbûnê ew ê teqez bi ser bikevin.”