Li paytexta Elmanya Berlînê, Komuna Ciwanên Enternasyonalîst a Berlînê çalakiya bêîteatiya sivîl li dar xist. Ciwanan pankarta bi nivîsa “Em Şerê Cîhanê yê 3'emîn red bikin - Em fuzeyên menzîla navîn ji Elmanyayê re naxwazin - Em li Kurdistanê Eurofightersê naxwazin" li ser peykerê Molecule Man a li bajêr daliqandin û amadekariyên şer ên Elmanyayê û rola wê ya di qada navneteweyî de şermezar kirin.

'ELMANYA DIBE HEVKARÊ ŞERÊ LI DIJÎ KURDAN'

Ciwanan bertek nîşanî daxuyaniya Serokwezîrê Elman Olaf Scholz a di Civîna Bilind a NATO'yê de gotibû wê fuzeyên menzîla navîn ên DYE’yê ji nû ve li Elmanyayê bên bicihkirin, dan. Ciwanan destnîşan kirin ku bi vê biryar re wê Elmanyayê bike hedefa Rûsyayê û gotin: “Dewlemend şer dixwazin, ciwan pêşeroj dixwazin!" Ciwanan bertek nîşanî erêkirina firotina balafirên şer ên Eurofighter a ji bo dewleta Tirk dan. Endamên Komuna Ciwanan ragihandin ku bomberbaran û dagirkeriya dewleta Tirk a li Kurdistanê bi hevkariya Elmanyayê didome.

‘BILA HEMÛ ŞER BÊN RAWESTANDIN’

Ciwanan bang li hemû ciwanan kirin ku li dijî şer û milîtarîzmê bên ba hev û gotin, "Şerê li Kurdistan, Îsraîl, Ukrayna, Sûdan û li her derê rawestînin! Em daxwaza avakirina eniyeke berfireh a li dijî milîtarîzmê dikin."

LI BERLÎNÊ ÇALAKIYA ‘JI RÊBER APO RE AZADÎ’ HAT LIDARXISTIN

Endamên Komîteya Jinên Ciwan a ji bo Aştiyê li Deriyê Brandenbûrgê li Berlînê pankart daliqandin. Jinên ciwan pankarta bi posterê mezin ê Rêber Apo û nivîsa "Ji Abdullah Ocalan re azadî" vekirin, meşale pêxistin û bal kişandin ser tecrîda mutleq ya li Îmraliyê tê meşandin.

Jinên ciwan daxuyaniyeke nivîskî da û nerazîbûn nîşanî tecrîda li ser Rêber APO dan. Jinên ciwan bal kişandin ser bombebarana dewleta Tirk a faşîst a bi piştgiriya çekan a dewletên Ewropayê li Kurdistanê tê kirin.

Di daxuyaniyê de wiha hat gotin: "Hikûmeta Elman beriya mehekê ji bo piştgiriya polîtîkaya îllegal a bi Tirkiyeya faşîst re firotina çekan zêde kir. Em daxwaza çareseriya siyasî ya pirsgirêka Kurd dikin, divê Abdullah Ocalan di vê mijarê de bi awayekî çalak rola xwe bilîze. Ev ê ji bo muzakereyên aştiyê yên herêmên din ên Rojhilata Navîn û cîhanî bibe mînak. Em vê çalakiyê ji bo piştgiriya pêngava ‘Ji Abdullah Ocalan re azadî ji pirsgirêka Kurd re çareseriya siyasî’ li dar dixin.”

Daxuyanî wiha berdewam kir: “Konfederalîzma Demokratîk nîşan da ku ew alternatîf e. Em ji FRG’ê daxwaz dikin ku tecrîda li ser Abdullah Ocalan bi dawî bibe, firotina çekan a ji bo Tirkiyeyê tavilê rawestîne û ji ber binpêkirina mafên mirovan, endamê NATO'yê bê cezakirin. Em bang li gelê xwe dikin ku ji bo aştî, demokrasiyê û rûmeta mirovahiyê bi hev re rabin ser piyan û alternatîfeke civakî ava bikin."