Kongreya Avakirina Dersimê (DÎK) 3’yemîn Civata xwe ya Giştî ya Asayî li Navenda Çandê ya Elewiyan a Oberûrsel a li bajarê Frankfûrt ê Elmanyayê pêk anî.

Civata Giştî, di şexsê kesên di salên 1937-1938'an de li Dersimê hatin qetilkirin de bi deqeyeke rêzgirtinê destpê kir. Piştre jî ji bo dîwanê Hevserokê FEDA’yê Demîr Çelîk, Ozlem Yilmaz û Haydar Uç hatin hilbijartin.

Nûnerên Navenda Dîrok û Lêkolînê ya Dersimê, Komeleya Kurmeşiyan, Meclîsa Kurecîkê ya Navneteweyî, Komîteya Ekolojiyê ya KCDK-E, Federasyona KAWA, Partiya Çep a Kesk Ewropa, FEDA û Yekîtiya Jinên Elewî yên Demokratîk jî tevlî civatê bûn.

Nûnerên saziyan bal kişandin ser girîngiya DÎK'ê û hat diyar kirin ku ji bo DÎK xebatên xwe bigihîne UNESCO, YE û NY’yê û ji bo Qirkirina Dersimê û qirkirina çandî û xwezayî ya dewam dike bê qebûlkirin behsa girîngiya xebatên giştî hat kirin.

Di civata ku pirsgirêkên heyî û dîrokî yên Dersim û derdora wê hatin vegotin de, behsa êrîşên li hemberî bawerî û xwezaya Dersimê hat kirin.

Di civatê de ji bo saziyên ku ji bo pirsgirêkên Dersimê xebatê didin meşandin hat diyar kirin ku li dijî asîmlasyona dewletê û texrîbata xwezayê divê xebatek rêxistinkirî bidin meşandin. 

Rêveberiya Kongreya Avakirina Dersimê ya ji 7 kesan pêk tê, hat diyarkirin. Rêveberiya nû di civîna xwe ya yekemîn de wê wezîfeyên xwe diyar bikin.