Ma Muzîkê di Mijdara 2024’an de pirtûka "Repertuara Stranbêjiyê" weşand.

Bi dirûşma “Milyonek Pirtûk, Milyonek Zarok” dest bi kampanyayekê kirin û çapa yekem a pirtûkê di demeke kin de li Kurdistanê qediya. Çapa duyemîn a pirtûkê gihîşt Ewropayê.

Ma Muzîkê 20 hezar pirtûk li TIR’ekê bar kir û anî Ewropayê. Ji amadekarên pirtûkê Şêrko Kanîwar ji ANF'ê re axivî û ev tiş anî ziman: “Weke Ma Music bi komeke xurt a ji 10 kesan pêk tê em hatin vir. Em ê beşdarî pîrozbahiya Newrozê bibin. Em duh (20'ê Adarê) li Amsterdamê bûn. Eleqeyek mezin ji bo pirtûkan hebû. Em spasiya her kesî dikin. Bila zarokên me bê nota û muzîkê nemînin."

Kanîwar û hevalên wî wê beşdarî 4 pîrozbahiyên Newrozê din bibin û ji bo zarokan pirtûkan îmze bikin.

Pîrozbahiya Newrozê ya ku ew ê tevlî bibin wiha ne:

22’yê Adarê: Zurîh

23’yê Adarê: Marsîlya

29’ê Adarê: Frankfurtê

30’ê Adarê: Viyana

Pirtûka ku 233 rûpel in bi formata A4 hatiye çapkirin û ji du beş bi navê “Stranên Zarokan” û “Stranên Gelerî” pêk tê. Di beşa Stranên Zarokan de 50 û di beşa Stranên Gelerî de jî 60 berhem hene.

Di pirtûkê de gotin û notên stranan hene. Ji bo guhdarkirina stranan jî kodek QR heye. Berhemên di pirtûkê de bi zaravayên Kurmancî, Dimilî û Soranî yên Kurdî ne û bi alfabeya Latînî hatine nivîsandin.