Li bajarê Aarau yê Swîsreyê di çarçoveya pêngava “Ji Abdullah Ocalan re azadî, ji pirsgirêka Kurd re çareseriya siyasî” stand hat danîn. Stand bi al û wêneyên Rêberê Gelê Kurd Abdullah Ocalan hatin xemilandin. Di standê de tecrîda Îmraliyê, êşkence û pergala qirker hat teşhîrkirin. Di standê bi sedan belavok hatin belavkirin.

PARLAMENTERÊ PARTIYA KESKAN: DIVÊ DEMILDEST TECRÎD BI DAWÎ BIE

Parlamenterê Partiya Keskan (Grüne) Marcus Dietschi serdana standê kir û got: “Kurdan nîşan da ku azadî li çar parçeyên Kurdistanê pêkan e. Ev bi bandor e. Ji ber vê yekê ye ku Abdullah Ocalan bi salan e di girtîgehê de ye û tecrîd li ser tê meşandin. Divê demilest tecrîd bi dawî bibe. Divê Ewropa azadiya Kurdan û tecrîdê bigre dest. Di heman demê de divê em piştgirî bidin têkoşîn û berxwedana Kurdan a li Rojhilata Navîn.”

‘TECRÎD BINPÊKIRINA HIQÛQÊ YE’

Stand saet 13.00’an dest pê kir û heta 17.00’an bi daxuyaniyekê bi dawî bû. Li ser navê pêngavê daxuyanî hat dayîn û wiha hate gotin: “Li seranserî cîhanê bi milyonan Kurdan got, Rêberê Gelê Kurd Abdullah Ocalan ‘vîna mine’ û xwedî lê derket. Zêdetirî çar salan e bêpeywendiyek mutlaq heye. Tu peywendiyê wî bi dinyayê re nine. Tecrîda li Îmraliyê binpêkirina hiqûqa Tirkiyeyê û ya navneteweyî ye.”

‘DIVÊ BI FÎZÎKÎ AZAD BIBE’

Di daxuyaniyê de hate gotin ku divê tecrîd demildest bi dawî bibe û ev tişt hate gotin: “Divê derfetên hevdîtinê yê malbat û parêzerên Rêberê me bên avakirin. Rêberê me kilîda sereke ya pirsgirêka Kurd e. Her kes jî vê yekê baş dizane. Divê di lêgerîna çareseriya siyasî ya adil û demokratîk a pirsgirêka Kurd de firsend bê dayîn û ji aliyê fîzîkî ve azad be.”

Daxuyanî bi dirûşmetên “Bijî Serok Apo” û “Es lebe Öcalan” bi dawî bû.