'Nobeda Azadiyê' ku ji aliyê Înîsiyatîfa Azadî ji Abdullah Ocalan re ji bo azadiya fîzîkî ya Rêberê Gelê Kurd Abdullah Ocalan û bidawîkirina tecrîdê li bajarê Strasbourg ê Fransayê destpê kir, dewam dike.

Nobeda ku çalakiya herî demdirêj a Kurdên li Ewropayê ye, di hefteya 587'an de bi koma ji sê welatparêzên ji Swêdê hatin, dewam dike.

Şehnmûs Çetînkaya, Ezîz Bamo û Ciwan Şahan di nava komê de hene.

Berdevkê komê Şehmûs Çetînkaya bi bîr xist ku sê sal in ew nikarin agahiyê Rêberê Gelê Kurd Abdullah Ocalan werbigirin û anî ziman ku divê tavilê agahiyekê ji Ocalan werbigirin. Çetînkaya bang li Kurdan hemûyan kir ku xwe nas bikin, ji bo doza xwe bixebitin û got, "Divê Kurd li tevahiya cîhanê bibin yek."

Ezîz Bamo jî got, "Sê sal in em nikarin agahiyê ji Rêber Apo werbigirin" û diyar kir ku ji bo li ber tecrîdê rabin û nerazîbûnê li dijî dewleta Tirk a dagirker nîşan bidin ew tevlî çalakiyê bûne.