Hejmara 486’emîn a rojnameya Serxwebûnê derket. Bi wesîleya salvegera 26’emîn a şehadeta gerîlaya PKK’ê Zeynep Kinaci (Zîlan) a ku di 30’ê Hezîrana 1996’an de li Dêrsimê li hemberî artêşa Tirk çalakiyeke fedaî kiribû, nirxandinên ku Rêberê Gelê Kurd Abdullah Ocalan di 5’ê Tîrmeha 1996’an de kiribû, bi sernavê ‘Zîlan manîfestoya xwediya dozeke mezin e’ hate weşandin.

Di rojnameyê de Abdullah Ocalan ji bo çalakiya Zîlanê dibêje “Çalakiya heval Zîlan ne wekî ku tê gotin ‘çalakiyeke xwekuştinê’ ye. Ev çalakiyeke serdemî ye, dîrokî ye, bi plan e, têra xwe rêxistinkirî ye, gelekî wêrek û fedakarî ye. Divê wekî çalakiyeke êrîşê ya aliyên wê pêşverû gelek in, were nirxandin. Çalakiya heval Zîlan tê wateya ku di nav partiyê de divê mirov zelal be, bi gotin û demagojiyê kar nameşe. Tê wateya jiyîna bi kesayetiya ku firsendê nade helwest û tevgerên ku ne li gorî esasên me yên îdeolojîk, siyasî û rêxistinî ye.”

Di rojnameyê de geşedanên li Kurdistan, Rojhilata Navîn û dinyayê jî nirxandin. Hêlîn Umît û Dûran Kalkan jî derbarê pêvajoya siyasî nivîsandine.

Helîn Umît di nivîsa xwe de ya bi sernavê “Sala 2022’an wê bibe sala serfiraziyê ya stratejiya şerê gel a şoreşgerî” de bi nivîseke berfireh li ser rewşa hêzên modernîteya kapîtalîst disekine û diyar dike faktora sereke ya li ser geşedanên li Tirkiyeyê, şerê li Kurdistanê ye.

Dûran Kalkan jî bi sernavê ‘Tengijîna pergala kapîtalîst a global û çareseriya Kurdistana azad de’ li ser nêzikatiyên hêzên global, aloziya ku tê de ne û krîzê li gorî encamên şerê Ukraynayê dinirxîne.

Kalkan li ser armanc û hedefa NATO’yê ya ku wekî ‘Gladyoya super’ û ‘rêxistina kontragerîla’ tevdigere diyar dike ku NATO hêza parastinê ya modernîteya kapîtalîst e. Kalkan ji bo tifaqa PDK û TC’yê jî dibêje ‘Ev tifaqa DYE-TC û NATO-TC’yê ye.’

Di nivîsa li ser êrîşên li hemberî Rojava û geşedanên li Başûrê Kurdistanê tê nirxandin de jî gotin “Feraseta malbatî ya PDK’ê, ji bo êrîşên dagirker ên ku dewleta Tirk li Başûrê Kurdistanê didomîne, faşîzma AKP û MHP’ê li hemberî îradeya gelê Kurd, berxwedana Rêber Apo û gerîlayan têk çûye û faşîzma AK-MHP’ê ya ku li Zapê têk çû, hewl dide êrîşên xwe li qadên cihê bike.”

Di vê hejmara Serxwebûnê de nivîseke bi navê ‘Kronolojiya PDK’ê û nijadperestiya paşvemayî ya ku ji dema avakirinê heta niha her dem di nav îxanetê de be û dîroka îxanetê nivîsandiye’ jî heye.

Di beşa duyemîn a nivîsê de şerê di navbera rêveberiya Başûrê Kurdistanê, Kerkûk di serî de herêmên ku li ser wan nîqaş hene, referandûma Kerkûkê, êrîşên DAÎŞ’ê û êrîşên ku PDK’ê dibe ser PKK’ê tên nirxandin.

Di hejmara nû de Firaz Garzan jî bi nivîsa ‘Wekî metoda dagirkerî û qirkeriyê, guherandina avadaniya demokratîk’ de qala polîtîkayên îskan, tehcîr û asîmîlasyonê yên du sed salên dawîn ên li Kurdistanê dike.

Xebat Andok jî bi sernavê ‘Ber bi dawiya pergala Gladyoya taybeta  Erdogan’ çeteyên girêdayî Erdogan ên bi navê SADAT, Ocaxên Osmaniyan û Ocaxên Tevgera Taybet dinirxîne. Andok diyar dike artêşa ku li hemberî Tevgera Azadiyê ya Kurdan şer dike, rêxistineke Gladyoyê ye.

Nirxandinên Endamê Komîteya Rêveber a PKK’ê Dûran Kalkan, Endama Komîteya Navendî ya PKK’ê Hêlîn Umît û Endamê Konseya Rêveber a KCK’ê Mûstafa Karasû li ser ‘Meşa azadiyê ya 50 salan a bi Rêbertî re’ ya ku Medya Haber Tvyê de hatibû weşandin, di vê hejmara rojnameyê de jî hate weşandin.

Nedîm Seven jî bi nivîsa ‘Daxwaza berfirehbûnê ya NATO’yê û krîzên ku ava dike’ dibêje ‘Rejîma Tirk a faşîst, êrîşên qirkirina Kurdan bi pesendkirina hêzên global pêk tîne’.

Di vê hejmarê de du nivîsên li ser şehîd û bîranînan heye. Di salvegera 34’emîn a şehadeta Ahmet Kesîp (Cemşîd) ê ku yek ji fermandarê mezin ê Serhedê bû, bi nivîsa ‘Lehengekî berdêla artêşekê, Ahmet Kesîp – Cemşîd’ tê bîranîn.

Di berga dawîn a rojnameya Serxwebûnê de jî qala têkoşîn û jiana Azad Botan dike yê ku li Gabarê şehîd bûbû.