Li gorî daxuyaniya Wezareta Karên Hundir, serê sibehê li çar eyaletan "tevdîrên polîsî" hatin wergirtin.

Wezaretê bi rêya Twîtterê daxuyaniyek da û diyar kir, serdegirtin li dijî koma bi navê "Nordadler" (Teyrên Bakur) hatiye kirin.

Berdevkê Wezareta Karên Hundir Steve Alter got, "Li ser înternetê jî cihê rastgiriya tund û antîsemîtîzmê nîne."

Kom bi giranî li ser înternetê çalak bû. Wezaretê ragihand, ku kom li ser şopa îdeolojiya nasyonal-sosyalîst e û tevî "Nordadler" her wiha bi çar navên cuda kar dikir. Hemû jî navê gelê Elman destnîşan dike: "Völkische Revolution", "Völkische Jugend", "Völkische Gemeinschaft" û "Völkische Renaissance"

Wezareta Karên Hundir diyar kir ku endamên komê soz li ser girêdana bi Adolf Hîtler û nûnerên girîng ên rejîma Nazî dane, ziman û sembolên rejîma Nazî bi kar anîne.

Sala 2018'an piştî serdegirtina li Nordadler, damezrînerê komê ji NDR'ê re axivî bû û diyar kiribû ku ew xwe Nazî dibîne û li dijî siyasetmedaran wê êrişê bikin.

Dozgeriya federal jî wê demê bi daxuyaniyekê ragihandibû ku kom hewl dide çek, cebilxane û teqemeniyê bi dest bixe.

Li gorî Wezareta Karên Hundir Nordadler 20'emîn komeleya rastgiriya tund e ku hatiye qedexekirin. Di nava salê de jî ya sêyemîn e ku hatiye qedexekirin. Meha Çileyê koma bi navê "Combat 18" û meha Adarê jî koma bi navê "United German Peoples and Tribes" hatibûn qedexekirin.