Bi wesîleya salvegera avabûna Kongreya Neteweyî ya Kurdistanê (KNK) ya 20’emîn li Den Haagê semînerek hate lidarxistin.

Ji çar parçeyên Kurdistanê kes û sazî tevlî semînerê bûn. Çalakgerên greva birçîbûnê Huseyîn Yildiz û Hasbî Çakici yên li Den Haagê jî di semînerê de axivîn.

Endamê Konseya Rêvebir a KNK’ê Zubeyîr Aydar diyar kir ku ji bo têkoşîna ji bo azadiya Kurdistanê bi ser bikeve divê yekîtiya hêzên siyasî û leşkerî yên li parçeyên Kurdistanê pêk werin.

Aydar bal kişand ser vî tiştî ku avakirina dîplomasiya hevpar, parastina hevpar û çanda hevpar ji bo yekîtika neteweyî hewce ye û got ku “Ev cihêtî divê xizmetê ji yekîtiya neteweyî re bike. Zimanê zikmakî faktora sereke ya yekîtiya neteweyîye.”

Nesrîn Abbas jî piştî Aydar axivî û diyar kir ku divê di tevgerekê de îdeolojiyek pêk were û got ku “Di nav PKK’ê de Rêber Apo têkoşîna jinan dike bingeh. Bi vê re jinên Kurd di her qadên jiyan û têkoşînê de rolek wergirtin. Bi vî awayî guherîna civakî û veguherîn bi awayê erênî bi pêş dikeve.”