Li ser banga Platforma Defend Rojava li Qada Repûbîqûeyê çalakî saet 15:00’an destpê kir. Bi hezaran kesên herikîn qadê ji bo protestokirina êrîşên qirker û dagirker ên dewleta Tirk dirûşma ‘Terorîst Erdogan’ qîr kirin.

Nûnerê Tikiliyên Karê Derve yê TEV-DEM’ê Aldar Xelîl ê bi rêya telefonê di mîtîngê de xîtabî gel kir got: “Dewleta Tirk bi êrîşên xwe yên li ser Rojava dixwaze demografiya herêmê bide guhertin. Divê hûn gelê me û dostên me yên li Ewropa yê zêdetir xwedî li Rojava derbikevin û pêşiya dagirkeriyê bigirin. Bijî berxwedana gelê me û berxwedan bi ser bikeve.”

Çalakvanên ku sirûdên berxwedanê yên TEV-ÇAND’ê qîr kirin, Êlek Zer jî ketin qadê û destek dan çalakiyê.

Di çalakiyê de Nûnerê Weqfa Danîelle Mîtterrand Jeremîe Chomotte, li ser navê Partiya Komunîst a Fransa Pascal Torre, li ser navê PYD Fransa jî Xalit Îsa axivîn. Di axaftina de banga baykotkirina berhemên Tirkî hate kirin û ev hate gotin: “Divê em gelê Kurd ê bi berxwedana Kobanê çeteyên dijminê mirovahiyê têk birin bi tenê nehêlin. Divê welatên Yekîtiya Ewropayê li dijî dagirkeriyê gavên şênber bavêjin. Em ê her tim li gel gelê Kurd bin. Em rê nadin faşîzma Erdogan.”

Di meşê de belavokên dagirkerî û qetlîamên dewleta Tirk vedibêjin hatin belavkirin û banga hê xurtir xwedîderketina li Rojava hate kirin.