Gerîlayên azadiya Kurdistanê Sarya Lorîn, Cîhan Hîvron, Ozgur Serhildan û Cafer Erzek ên di 25'ê Mijdara 2019'an de li Herêmên Parastinê yên Medyayê şehîd bûn, di civîna gel de hatin bibîranîn.

Merasîm bi deqeyek rêzgirtina ji bo şehîdên şoreşê destpê kir. Piştre sînevîzyona li ser jiyan û berxwedana şehîdan hate pêşandan. Di pêşandana sînevîzyonê de dem bi dem dirûşma “Şehîd namirin” hate berzkirin.

‘ŞEHÎDÊN ME ŞEHÎDÊN GELÊN KURDISTANÊ NE’

Xizmê şehîd Sarya Lorîn, Îbrahîm Serhed di merasîmê de axivî û got, “Lorîn û hemû şehîdên fedayî ne tenê şehîdên malbatên xwe, şehîdên tevahî gelên Kurdistanê ne. Li dijî zilmê bûne sembola berxwedanê û têkoşîna azadiyê. Têkoşîna wan wê rêya me ronî bike û em soza şopandina rêya wan didin.”

‘GELÊ KURD TÊKOŞÎNA AŞTÎ Û AZADIYÊ DIDE’

Siyasetmedar û aktîvîstê Kurd Botan Hozan jî di merasîmê de axivî û diyar kir ku gelê Kurd bi salane bedelên mezin dane û wiha axivî: “Têkoşîna me ne tenê ji bo azadiya gelê Kurd, ji bo hemû gelên Rojhilata Navîn di nava aştiyê de bijîn e. Fikrên Rêber Apo li ser bingeha wekhevî û azadiya gelan e. Gelê Kurd bi berxwedana xwe ya bi rûmet a ku bi salan tê meşandin îlham daye gelên cîhanê. Em soza bilindkirina têkoşîna şehîdan didin.”

Piştî axaftinan civîna gel hate lidarxistin û li ser geşedanên dawî nîqaş hatin kirin. Beşdaran li ser rewşa siyasî ya gelê Kurd û têkoşîna azadiyê nêrînên xwe parve kirin û pirs pirsîn.

Di dawiya civînê de hevpeyvîna dawî ya Hevserokê Konseya Rêveber a KCK'ê Cemîl Bayik a di Sterk TV'yê hate weşandin, hate pêşandan. Peyama Bayik bi baldarî hate guhdarkirin û gelek caran dirûşmên “Bijî Serok Apo” û “Şehîd namirin” hatin berzkirin.