Li paytexta Ermenistanê Erîvanê bi boneya salvegera 110’emîn salvegera Qirkirina Ermeniyan merasîma bîranînê hate lidarxistin. Girse piştî merasîma fermî ya dewletê di saet 11:00’an de ber bi qada Tsitsernakabertê ve meşiyan. Wek her sal saziyên Kurd bi al û çelengê xwe tevlî merasîma bîranînê bûn.

Li cihê bîranînê Komîteya Kurdistanê bi daxuyaniyekî çapemeniyê qirkirina gelê Ermenî şermezar kir.

Li ser navê Kurdan Hevserokê Komîteya Kurdistan Silo Dirboyan û endama Yekîtiya Jinên Azad Seyran axivîn.

Silo Dirboya got; “Em wek gelê Kurd her sal tên û êşa Ermenan bi wan re parve dikin û em kesên ev qirkirin pêk anînê şermezar dikin.”

Dirboyan wiha dewam kir: “Em dizanin dewleta Tirk gelek qirkirin bi ser gelan de anîyê û heta roja îro jî dewam dike. Weke gelê Kurd me jî gelek ferman û qirkin dîtiyê. Em carek dîn wek Komîteya Kurdistan û gelê Kurd ev qirkina ku di sala 1915’an de bi ser gelê Ermenî de hatiyê şermezar dikin û êşa wan parvedikin.”

Seyrana Celad jî wiha got: “Em êşa fermanan baş dizanin, ji ber ku heta roja îro ferman bi ser me de tên. Ji bo ku ferman bi ser ti gelî de neyên, fikir û felsefayê Rêber Apo rêya çareseriyê ye û we pêşî li fermana bigre. Ji ber ku ew felsefeya wekhevî, aşîtî û jiyana hevpar a gelan temsîl dike. Em carek dîn hemû qirkirinê ku bi ser gelan de hatinê şermezar dikin.”