Sporvanên Kurd yên li Ewropayê jiyan dikin, li bajarê Koln yê Almanyayê hatin cem hev û biryara rêxistinbûnê dan. Di civîna ku di bin pêşengiya Federasyona Komeleyên Kurd yên li Ewropayê (KON-KURD) hate organîzekirin de, Yeketiya Sporvanên Kurd ‘Kurd Sport’ hate avakirin.

Li bajarê Kolnê duh li derdora 70 sporvanên Kurdistanê yên ji Holanda, Belçîka, Almanya, Fransa, Denîmarka, Swêd, Swîsre û Awûstûrya hatin, li gel hev kombûn. Di civîna ku sporvanên ji beşên sporê yên weke Futbol, basketbol, volyebol, hentbol, melevanî, atletîzm, tekwando, kick-boks, halter û hwd..tevlîbûyî di bin pêşengtiya Federasyona Komeleyên Kurd yên li Ewropayê (KON-KURD) pêkhat.

Di civîna ku rewşa sporvanên Kurd yên li Ewropayê hate destgirtin de, biryara rêxistinbûn û bi hev re tevgerkirinê hate girtin. Piştî nîqaşên hatin kirin, Yeketiya Sporvanên Kurd ‘Kurd Sport’ hate avakirin. Weke din di civînê de rêzikname û programa yeketiyê hate avakirin û qebûl kirin.

Biryar hate girtin ku, li her welatekê nûnertiya xwe vekin û di dawiya civînê de jî endamên lijneya rêveberî û hevserokên yeketiyê hatin hilbijartin. Hesen Acar û Tulay Ozçelîk weke hevserokên yeketiyê hatin hilbijartin, di rêvebertiyê de jî van kesan cihê xwe girt: Fethî Çiya, Armanc Egîd Nêrweyî, Jale Mihemediyan, Derwêş Genc û Jiyar Elî.