Şaxa Saziya Zimanê Kurdî (SZK) ya Efrînê konferansa xwe ya yekemîn lidar xist.

Konferans bi diruşma ‘‘Asta pêşxistina ziman asta pêşxistina jiyanê ye’’ roja 15`ê Tebaxê bi beşdariya 700 delegeyên endamên SZK’ê û mamosteyên zimanê kurdî hate pêkanîn.

Di Konferansê de  endamê Tevgera Civaka Demokratîk (TEV-DEM) Bedran Çiya axaftina vekirinê kir û li ser girîngiya ziman rawestiya. Di konferansê de her wiha li axaftina Rêberê Gelê Kurd Abdulah Ocalan a derbarê zimanê kurdî de hate guhdarîkirin û perspektîfên SZK’ê yên der barê xebatên zimanê kurdî de hatin xwendin.

Piştî ku rapora xebatên SZK'ê yên salekê hate xwendin û nirxandin, beşdarên konferansê der barê mijarên mîna pergala rêxistinî ya SZK'ê, perwerdeya endaman, rêzikname û bernameya saziyê nirxandinên girîng kirin. Di encama nirxandinan de komîteyên têkildar hatin avakirin.

Di konferansê de, ji bo rêvebirina karûbarên saziyê, desteya rêveberiyê a ji 43 kesan pêk tê hate hilbijartin.

Konferans bi axaftina endama Yekîtiya Star Erşem Kurdman bi dawî bû.