Êrîşên çeteyên dijminê mirovahiyê DAIŞ’ê yên li hemberî Kobanê li bajarên cuda yên Ewropayê tên protestokirin. Di çalakiyan de DAIŞ û dewleta Tirk ku bi sedema rola wê di êrîşê de heye hat lanetkirin.

SAARBRUCKEN

Li bajarê Saarbrucken ê Elmanyayê êrîşa çeteyên DAIŞ’ê ya li hemberî Kobanê hat protestokirin. Kurdên li navenda Saarbruckenê hatin cem hev alên YPG-YPJ’ê hildan û bi mîtînga ku pêk anîn êrîşa terorîstî ya li hemberî Kobanê pêk hat protesto kirin.

Di axaftinên de, hat diyar kirin ku Kurd bi van êrîşan têk naçin, berevajî girêdana wan a bi welatê wan re zêdetir dibe. Di axaftinan de hat destnîşankirin ku beyî desteka welatên herêmî ev êrîşên terorê nekarin ji aliyê çeteyan ve pêk bên û bal kişandin ser rola Tirkiyeyê ya di êrîşan de. Hat gotin ku piştî serketina HDP’ê ya di 7’ê Hezîranê de û têkçûna DAIŞ’ê ya li dijî YPG û YPJ’ê, Tirkiye û DAIŞ bi hev re tevgeriyane.

PARÎS

Li paytexta Parîs a Fransayê jî li herêma Vîllîers le Bel bi pêşengiya Ciwanên Azad meşek pêk hat û DAIŞ hat protestokirin.  Girseyê dirûşmên, "Bijî berxwedana Kobanê", "Terorîst Tirkiye, terorîst DAIŞ" berz kirin û daxuyaniyek dan. Di daxuyaniyê de hat diyarkirin ku êrîşên DAIŞ’ê bi desteka dewleta Tirk pêk hatiye û hat diyarkirin ku qezencên Kurdan hezm nakin.”

Her wiha ji bo meşa protestoyî ya îro saet di 17.00’an de li ber Navenda Civaka Kurd a Demokratîk a Parîsê tê kirin jî banga beşdarbûnê hat kirin.