Êrîşa li hember mîtînga HDP’ê ya Amedê li paytexta Fransa Parîsê bi daxuyaniyeke çapemeniyê hat şermezarkirin. Girseya di nav de Koordînasyona Fransa ya HDP’ê, CDK-F, ACTIT, nûnerên Navenda Civaka Demokratîk a li Parîs û derdora wê ji ber Navenda Çand û Hunerê ya Kurd heta Bîrdariya Serketinê ya li Strasbourg Saint Denis meşiya. Di mîtîngê de dirûşmên, “Qatil AKP”, Dîktator Erdogan”, “Bijî HDP”, Bimire rejîma faşîst a Tirkiye” hatin gotin.

Li ber bîrdariyê piştî deqeyek rêzgirtinê ji Koordînasyona Fransa ya HDP’ê Îsmaîl Çakici axaftinek kir. Çakici êrîş şermezar kir û got ji ber hikûmeta AKP’ê û Erdogan ên ditirsin HDP bendê derbas bike bûne sedema êrîşan.

Hevserokê KCD-E Murat Ceylan jî di axaftina xwe de got: “Sedema van êrîşan ev e ku Davutoglu û Erdogan HDP’ê dikin hedef.”

Ceylan diyar kir bi van êrîşan wê pêşiya HDP’ê neyê girtin û gelên Tirkiyeyê wê di sindoqê de hesab ji rejîmê bixwaze.

Seval Gundogdu ya li ser navê ACTIT axivî got, teqîna li hember mîtînga HDP’ê ya li Amedê provokasyon û tehlûkeya komkujiyê ya hişyariya wê dihat kirin e.

Her wiha têkildarî êrîşa li Amedê navendên Civaka Demokratîk ên li Parîs û derdora wê, rêxistinên şoreşger, çep û sosyalîst gotin “Em ê îro saet 14.00’an di van rojên ku faşîzm gihiştiye asta herî jor, bi gotina, em ê biçin Meclîsê em li Qada Bastîle ne.”