Mamosteyê Kurdî Fevzî Ozmen, ku ev demeke dirêje li Elmanyayê dersên zimanê Kurdî dide, ezmûnên xwe di pirtûka bi navê "Perspektîf-Dersên Rêzimana Kurdî (Kurmancî)" de li hev kom kir.

Li Elmanyayê, ev pênc sal in bi taybetî li eyaleta Westfalya Bakurê Rhehinê (NRW) li gelek eyaletan, ji aliyê Enstîtuya Kurdî ve ji bo lêkolîn û zanistiyê ya zimanê Kurdî (Kurmancî) kurs tên dayîn. Kursên ku beriya niha ji aliyê mamoste Jîr Dilovan ve dihat dayîn, piştî nexweşiya wî ji aliyê Mamoste Fevzî Ozmen ve dewam kir.

Mamoste Ozmen xebatên xwe yên van pênc salan bingeh girtin û ezmûnên xwe yên berê û yên yê pêvajoyê kirin yek, bi kedeke kûr û lêkolînên nû, ev xebata xwe dewlemendtir kir.
Bi armanca pêxistina zimanê Kurdî di warê nivîs û rêzimanî de mamoste Ozmen pirtûka bi navê  Dersên Zimanê Kurdî (Kurmancî) amade kir.

Mijarên di vê pirtûkê de cih digirin, bi kurtî ev in:

Ji aliyê rêzimanî û bikaranînê ve hemû hêmanên rêzimanî yên wek cînav, navdêr, lêker, rengdêr, daçek, hoker û gihanekan wane bi wane digire dest û bi form, formûl û tabloyên nûjen, tewang û kesandinên hêmanan, bi mînak û pêhîniyan mijaran kûrtir, zelaltir û dewlementir dike.

Dîsa ev mijarên li jêr jî di pirtûka Mamoste Fevzi de cihê xwe digirin

- Beşeke pirtûkê ji bo bersivdanka pêhîniyan hatiye veqetandin.

- Ji bo xwendinê mînakên wêjeya kurdî ya kilasîk û nûjen.

- Lîsteya rayekên lêkeran ên tevlihev.

- Mînakên tabloyên rengîn yên hemû rawe û demên lêkeran.

- Ferhengoka têgînên rêzimanî.

- Lîsteya hin lêkeran bi sê zimanan.(kurdî-tirkî-almanî)

- Lîsteya lêkerên têneper ên cêwî (kurdî-tirkî-almanî)