Bi banga Komîteya Amadekar a 1'ê Gulanê gelek sendîka û saziyan xwestin ji bo pîrozkirina 1'ê Gulanê Cejna Karkeran biçin Taksîmê. Polîsan destûr nedan ku girseya gel biçe Taksîmê û êrîşî gel kirin.

Şaxê Stenbolê yê Komeleya Hiqûqnasan a Hemdem (ÇHD) ragihand ku zêdeyî 200 kes hatin binçavkirin. Hevserokê Giştî yê ESP'ê Mûrat Çepnî, parêzer Rojhat Tûnç, Sarîhan Efe Kadaîfçî, Lutfî Sabrî Bati, Arkin Hurtaş û Yûnûs Emre Işik jî di nava binçavkiriyan de ne.

Her wiha endamên Înşaat-Îşê yên ji bo meşa ber bi Taksîmê li Mecîdiyekoyê li hev kom bûn di nava binçavkiriyan de ne.

Ciwanên xwestin bimeşin Taksîmê bi dirûşma 'Binçavkirin, girtin û zext nikarin bi me' êrîşa polîsan şermezar kirin. Ciwanên ku dirûşma 'Qada 1'ê Gulanê Qada Taksîmê' qîriyan ji pişt ve hatin kelepçekirin û binçavkirin.

Endamên Partiya Sosyalîst a Bindestan (ESP) û SOLDEP dema dihatin Qada Şîşliyê hatin binçavkirin.