Mîrnişînên Ereb ên Yekbûyî der barê sabotaja dijî keştiyan de belgeyek pêşkêşî Konseya Ewlekariyê ya Neteweyên Yekbûyî kir. Di belgeyê de hate ragihandin ku êrîş operasyoneke 'sofîstîke û koordîneyî' ye, lê belê nehate eşkerekirin ku kîjan dewlet li pişt wê heye. Li binê belgeyê mohra Norwêc û Erebîstana Siûdî jî hene. Dewletên Yekbûyî yên Emerîkayê beriya niha yekser Îran ji êrîşê berpirsyar nîşan dabû.

Li gorî Mîrnişînên Ereb, Norwêc û Erebîstana Siûdî, ji bo pêkhatina êrîşê divê hêza ku êrîş kiriye xweş bi deryayê zanibe û xwedî noqkarên şareza be.

Di belgeyê de hate gotin, "Lêpirsîn didome. Agahî û belgeyên gihîştine ber dest nîşan didin ku her çar êrîş parçeyek ji operasyoneke sofîstîke û koordîneyî ne, ku ji aliyê aktorekî xwedî kapasîteya operasyonî û aktorekî dewletê ve hatibe kirin."

Du keştiyên petrolê yên Siûdî, keştiyeke Mîrnişînên Ereb ên Yekbûyî û tankereke Norwêcê 12'ê Gulanê bûbûn hedefa çalakiyeke sabotajê. Di bûyerê de tiştek bi kesî nehatibû, lê belê aloziya li Kendavê zêde kiribû.