Li gorî daxuyaniya polîsên Kabûlê, li Zanîngeha Parastinê ya Neteweyî ya Efgan êrîşeke xwekujî hate kirin.

Berdevkê polîsan Fîrdevs Faramarz daxuyaniyeke nivîskî weşand û diyar kir, êrîş nîvro li cihekî nêzî deriyê zanîngehê pêk hatiye.

Hate ragihandin, çalakgerê xwekuj bi peyatî hate herêmê û ji ber ku leşkerekî ew dît beriya ku bigihêje armanca xwe bombeyên li ser xwe teqand.

Polîsan diyar kirin, li gorî agahiyên destpêkê 6 kes mirine, 6 kes jî birîndar bûne.

Heta niha kesî berpirsyariya êrîşê negirtiye ser milê xwe. Akademiya leşkerî ya neteweyî sala 2005'an ava bû û li wê derê efserên payebilind ên artêşê perwerdeyê dibînin.

Beşeke zanîngehê baregeheke bi ewlekariya bilind e ku leşkerên NATO'yê lê ne.