Piştî ku Azerbaycanê roja Sêşemê li Qerebaxê jinûve dest bi şer kir, bi şertê destberdana ji çekan û entegrekirina herêmê li ser Azerbaycanê, agirbest hate ragihandin.

Piştî 24 saetan Qerebaxê qebûl kir ku dest ji çekan berde û bi navbeynkariya Moskowayê roja Pêncşemê dest bi danûstandinan kir.

Li Erîvanê jî li dijî hikumetê xwepêşandanan destpê kirin. Partiyên muxalefetê Serokwezîr Nîkol Paşînyan sûcdar dikin ku gelekî tawîzan dide Bakuyê û dixwazin îstifa bike.

Lîderên partiyên muxalefetê nêta xwe eşkere kirin ku li parlamentê pêvajoya dûrxistina Nîkol Paşînyan a ji wezîfeyê bidin destpêkirin.

Sibeha înê komên biçûk kolanên Erîvanê bloke kirin, her wiha hişyarî dan ku wê civîna desteya wezîran a Paşînyan asteng bikin. Polîsan yek ji amadekarên çalakiyan Andranîk Tevaniyan destgîr kirin.

Rojên Çarşem û Pêncşemê jî li Erîvanê bi dehan kes hatin destgîrkirin.

Çalakger her wiha ji hikumetê dixwazin ku ji bo alîkariya bi Ermenên li Qerebaxê tedbîran werbigire û ber bi Ermenistanê ve bêne veguhastin.

Serokwezîr Nîkol Paşînyan diyar kir ku ew amade ne 40 hezar penaberan qebûl bikin, lê belê plana wan a veguhastina hemûyan tune ye.