Tûgaya El Kassam ku baskê çekdar ê tevgera Fîlîstînî Hamasê ye, roja Yekşemê daxuyaniyek da û diyar kir ku di dema êrîşa Îsraîlê de ya li ser xaka Fîlîstînê fermandarê leşkerî yê Tûgaya Bakurê Xezeyê û sê efserên din hatine kuştin.

Ahmed el Handûr endamê Konseya Leşkerî ya Hamasê bû û bi taybetî di sala 2006'an de di navbera Îsraîl û Şerîda Xezeyê de li nuqteya derbasbûnê ya Kerem Şalom a li başûrê xaka Fîlîstînê di êrîşa li ser artêşa Îsraîlê de rol lîstibû. Ji ber vê yekê jî ji sala 2017'an û vir ve ji aliyê DYE'yê ve weke 'terorîst' tê qebûlkirin.

Artêşa Îsraîlê jî gelek caran êrîşî El Handûr kir, ku di êrîşên beriya niha 2 zarokên wî hatibûn kuştin.

Di daxuyaniyê de hate ragihandin ku yek ji sê kadroyên din ên hatin kuştin Ayman Sîam e ku weke serkêşê yekîneya roketan dihate naskirin.

Hamas têkildarî windahiyên xwe kêm caran daxuyaniyan dide.

Meha Cotmehê hatibû ragihandin ku ji fermandarên Tûgaya El Kassam Ayman Nofal li kampa penaberan a Bûreycê di êrîşa artêşa Îsraîlê de hate kuştin.

Li gorî hikumeta Hamasê li Şerîda Xdezeyê di êrîşên Îsraîlê de nêzî 15 hezar kes hatine kuştin.

Rayedarekî payebilind ê Îsraîlî hefteya derbasbûyî ragihand ku ji 7'ê Cotmehê dema destpêkirina şer û vir ve zêdeyî 50 fermandarên Hamasê kuştine. Lê belê ev agahî ji aliyê çavkaniyên cuda ve nehate piştrastkirin.